Нүүрсний хулгайн хэрэгт холбогдсон гурван гишүүний бүрэн эрхийг түдгэлзүүлэх саналыг Улсын Ерөнхий прокурор Их хуралд өргөн мэдүүлж, Халдашгүй байдлын дэд хорооны гишүүд прокурорын саналыг дэмжээд байна. Уг асуудлаар дөнгөж сая МАН-ын бүлэг хуралдаж, мэдээлэл хийлээ.

      МАН-ын бүлгийн дарга Д.Тогтохсүрэн “Бүлгийн хуралдаанаар Улсын ерөнхий прокурорын саналыг сонсож, Халдашгүй байдлын дэд хорооны мэдээллийг сонслоо. Эндээс гаргасан шийдвэрийг мөн танилцуулсан. Бүлгийн хуралд Ерөнхий сайд Л.Оюун-Эрдэнэ оролцож, баримталж байгаа намын байр суурийг илэрхийлж, чиглэл өглөө. Энэ чиглэлд УИХ-ын гишүүдийн бүрэн эрхийг түдгэлзүүлэн шалгах шаардлагатай гэж МАН-ын даргын хувьд байр сууриа илэрхийллээ. Тиймээс УИХ-ын гурван гишүүний бүрэн эрхийг түдгэлзүүлэх саналыг МАН-ын бүлэг дэмжиж байгаа юм” гэлээ.