УИХ-ын чуулганы нэгдсэн хуралдаан үргэлжилж байна. Хуралдаанаар Олон нитийн сүлжээнд хүний эрхийг хамгаалах тухай хуульд тавьсан Ерөнхийлөгчийн хоригийг хэлэлцэж байгаа юм. Хэлэлэцэж буй асуудалтай холбоотой гишүүд асуулт асууж, үг хэлж байна.

     УИХ-ЫН ГИШҮҮН Н.ГАНИБАЛ: Ерөнхийлөгчийн хоригийг дэмжих нь зөв. Гэхдээ МАН-ын гишүүд хоёр нүүртэй байна. Энэ хуулийг дэмжиж баталчихаад Ерөнхийлөгч хориг тавихаар Хууль зүй байнгын хорооны гишүүд нь 100 хувийн саналаар дэмжинэ. Анх энэ хуулийг хэлэлцүүлж эхлэхэд л АН-ын гишүүд завсарлага авч, хурлаа хаяж гарсан. Гэтэл зөрсөөр байгаад баталсан. Одоо болохоор Ерөнхийлөгч хориг тавихаар энэ зөв гээд алга ташаад байх юм. Ийм байдлаар төрийг удирдаж болохгүй. Дэндүү өрөвдөлтэй байна.

      Яагаад заавал фэйсбүүкийн асуудал дээр хүний эрхийг зөрчиж, үг хэлэх үзэл бодлоо илэрхийлэх эрхийг нь хаах гээд дайраад байгаа юм бэ. Энэ гэмт хэрэг, залилангийн бүх хэргээс хуулийн байгууллага урьдчилан сэргийлэх үүрэг хүлээж байгаа биз дээ. Үүргээ гүйцэтгэ. Энэ хуулийн хамгийн ноцтой заалт нь харилцаа холбооны тухай хуульд дагалдуулан оруулах заалт нь Ерөнхийлөгчийн бүрэн эрхт халдсан байсан. Яаран сандран 62 бүлгийнхэн оруулж ирсэн. Намын дарга чинь дандаа зөв юм хийдэггүй шүү гэдгийг харсан байх.

     УИХ-ЫН ГИШҮҮН О.ЦОГТГЭРЭЛ: Ардчилсан намын гишүүд энэ хуулийг эсэргүүцэж, чуулганы хуралдаанаа орхиж гарсан. Энэ бол маш олон зүйл заалтууд нь бусад хуулиа зөрчсөн. Ерөнхийлөгчийн хоригийг хүлээн авах нь зүйтэй.

     УИХ-ЫН ГИШҮҮН Д.ГАНБАТ: Монгол цэргийн баярын өдөр тохиож байна. Монгол Улсын Ерөнхийлөгч бид хоёр цэргийн хүмүүс. Цэргийн өдрийн өмнө Ерөнхийлөгчийн анхны хориг. Тэгэхээр монголын ард түмэндээ бэлэг болгоод энэ хоригийг 100 хувийн саналаар хүлээн авъя. Олон нийтийн сүлжээг хоригло шаардлага байхгүй. 

    УИХ-ЫН ГИШҮҮН Б.ЭНХ-АМГАЛАН: Энэ хуулийг хийгүй, чамбай боловсруулаад оруулаад ир гэсэн санаатай хориг тавьсан. Маш буруу зүйл хийсэн юм шиг ойлгуулаад байна.