Авлигатай тэмцэх газраас нүүрсний хэргийн талаар мэдээлэл хийлээ.

           Энэ үеэр АТГ-ын Мөрдөн шалгах хэлтсийн албаны дарга Б.Батбилэг “Нүүрсний асуудал сүүлийн 10, 20 жилийн асуудлыг мөрдөн шалгаж байгаа учраас цаг хугацааны хувьд нэлээд хугацаа орохоор байгаа. Ажлын цаг нэлээд өргөн байгаа. Мөрдөн шалгах байгууллагын хамтарсан ажлын хэсэг хичээн ажиллаж байна. Монгол Улсын хилээр буюу Гашуун сухайтын хилийн боомтоор хил нэвтэрсэн тээврийн хэрэгслийн бүртгэл дээр хянан шалгалтын ажиллагаа явуулж байна. Эндээс Хил хамгаалах ерөнхий газар, Гаалийн байгууллагадаа хамтарсан шалгалт, хэргийн бүртгэлийг сервер дээр шалгалт явагдсан. Одоогийн байдлаар 11 мянга гаруй тээврийн хэрэгсэл хилээр нэвтэрсэн мэдээллийг устгасан нөхцөл байдал тогтоогдсон. Мөн нэр бүхий Улсын Их Хурлын гишүүдийг Эрүүгийн хэрэг үүсгэж, яллагдагчаар татсан байж байгаа. Тэдэнд холбогдох хэргийн мөрөөр үйл ажиллагаа явуулах явцад зарим нэр бүхий гишүүдийн эрх бүхий бүрэн эрхийн асуудлыг хөндөх нөхцөл байдал нь үүсэж байгаа. Өнөөдрийн байдлаар бидний мөрдөн шалгах ажиллагааны явцад үндэслээд УИХ-ын гишүүн Д.Бат-Эрдэнэ, Т.Аюурсайхан, Н.Наранбаатар гэсэн гурван гишүүнд мөрдөн шалгах ажиллагааг явуулж байгаа. УИХ-ын гишүүний халдашгүй байдал, бүрэн эрхийн асуудалд саад учруулж байна гэж үзэж, нэр бүхий гишүүдийн бүрэн эрхийн асуудлыг түдгэлзүүлэх саналыг Улсын Ерөнхий прокурорт хүргүүлж байгаа” гэв.