Л.ОЮУН-ЭРДЭНЭ: Ирэх долоо хоногт хууль хяналтын байгууллагад шалгуулж байгаад оргон зайлсан этгээдүүдийн нэрсийг зарлаж, гадаад пасспортын үйлчлэх хугацааг хүчингүй болгоно

2023-03-01, 567

“Шилэн нам” эрдэм шинжилгээний хурал Төрийн ордонд боллоо. Энэ үеэр Ерөнхий сайд Л.Оюун-Эрдэнэ "Засгийн газраас 2023 оны авлигын эсрэг жил болгож, системийн авлигатай тэмцэх таван Ш ажиллагааг хэрэгжүүлж эхэлсэн.

Уул уурхай тэр дундаа нүүрс, зэс дагасан далд эдийн засгийг ил болгож, төрийн бүх шатанд үүрлэсэн авлигын үүр уурхайг таслаж, шимэгчдийг цэврэлэхэд улс төрийн намын сахүүжилтийг ил болгох, нам дагасан цүнх баригчдын томилгооны асуудал, хэт мөнгөнөөс хамаарлтай сонгуулийн тогтолцоог өөрчлөх шаардлагатай. Авлигын хөрсөнд ургасан хогийн ургамлыг таслах ажлыг Засгийн газар эхний “ дөрвөн Ш” буюу шүгэл үлээх, шүүр, шувуу, шилжүүлэн авах ажиллагааны хүрээнд олон нийтийн дэмжлэгтэйгээр далайцтай шийдвэрлэж чадна гэдэгт итгэлтэй байна.

Авлигын гэмт хэргийн талаар шүгэл үлээгчийн тухай хуулийг Улсын Их Хурлын хаврын чуулганаар хэлэлцүүлэн батлуулна. Улсын Их Хурал, Засгийн газрын гишүүд болон улс төрд нөлөө бүхий этгээдүүд, тэдний гэр бүлийн гишүүдийг төрийн удирдах албан тушаалд томилох, төрөөс санхүүжих тендер, зээл, тэтгэлэгт хамрагдахыг хориглосон хуулийн төслийг мөн энэ хаврын чуулганаар өргөн барьж батлуулна.

“Шувуу” ажиллагааны хүрээнд ирэх долоо хоногийн Засгийн газрын хуралдаанаар хууль хяналтын байгууллагад шалгагдаж байх явцдаа хилийн чанадад оргон зайлсан этгээдүүдийн нэрсийг зарлаж, иргэний гадаад пасспортын үйлчлэх хугацааг цуцалж, хүчингүй болгох асуудлыг хэлэлцэж, шаардлагатай тохиолдолд Улсын Их Хуралд оруулна.

Харин өнөөдрийн “Шилэн нам” хэлэлцүүлэг нь авлига ургаж буй хөрсийг орвонгоор нь өөрчлөх реформын эхлэл гэдгээрээ хамгийн чухал ач холбогдолтой хэмээн үзэж байна. Ерөнхий сайд, эрх баригч намын даргын хувьд Эх орончдын өдөр бол тэмдэглэлт баяр гэхээс илүүтэйгээр, нийгэмд тулгамдаж буй системийн авлигыг нам харгалзахгүйгээр тэмцэх эх оронч үзэл санааны нэгдэл хэмээн үзэж байна.

Бид сайхан ярьж, бие биедээ мэндчилгээ дэвшүүлж, цэцэг өргөсөөр удлаа. Одоо үнэнээ ярилцаж, цаг алдалгүй бодит шийдэл гаргах нь Монголын ирээдүйд илүү тустай билээ" гэлээ.

Л.ОЮУН-ЭРДЭНЭ: Ирэх долоо хоногт хууль хяналтын байгууллагад шалгуулж байгаад оргон зайлсан этгээдүүдийн нэрсийг зарлаж, гадаад пасспортын үйлчлэх хугацааг хүчингүй болгоно

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 0

Шинэ мэдээ

Нийтлэлчид