УИХ-ын дарга Г.Занданшатар өнөөдөр /2023.02.13/ Ардчилсан намын дарга Л.Гантөмөр, УИХ дахь Ардчилсан Намын бүлгийн дарга О.Цогтгэрэл, УИХ-ын дэд дарга С.Одонтуяа болон УИХ-ын гишүүн Ж.Батсуурь нарыг хүлээн авч уулзлаа. Уулзалтын эхэнд УИХ-ын дарга, парламентын ардчилалд цөөнхийн хяналт, бүтээлч оролцоо чухал гэдгийг онцлоод Ардчилсан намын даргаар сонгогдож, Монгол Улсын Дээд Шүүхийн нийт шүүгчдийн хуралдаанаас Ардчилсан намын даргаар бүртгэгдсэн Л.Гантөмөрт ажлын амжилт хүслээ.

       Арчилсан намын дарга Л.Гантөмөр Төрийн ордонд мэдээлэл хийх үеэрээ  “Монгол Улсын нийгэм, эдийн засаг, иргэдийн гомдол, саналын дүгнэлттэй танилцсан. Бидний хувьд сэтгэл эмзэглэм шинжлэх ухааны дүгнэлтийг харлаа. Иргэдийн 70 хувь нь хоолондоо арай хийж хүрч байна. Бид иргэдийнхээ ядуурлыг коронвирус болон Оросын дайн тулаантай холбохгүй байгаа. Ард иргэд төр засгийн буруу бодлогоос болж Монгол Улс ядуурлаа гэх судалгаатай танилцаж, ямар ажил хийх талаараа ярилцлаа. Нэгдүгээрт, 70 хувийн ядуурлыг богино хугацаанд бууруулах шаардлагатай. Ажил хийж байгаа хүмүүс залхсан байна. Бизнес эрхлэгчдийн 60 хувь нь сэтгэл дундуур байгаа. Татварын Ерөнхий хуулийг иргэд дэмжихгүй байгаа. Хоёрдугаарт, Нийгмийн даатгалын шимтгэлийг бууруулахгүй бол ажил хийх хүн олдохгүй. 50 хувь нь маргаашдаа санаа зовж байна. Хоёрдугаарт, ядуурал бууртал төр хувийн хэвшлийнхнийг дарамталж болохгүй. Хуулиар дарамталж болохгүй. Энэ асуудлыг тавдугаар сараас цэгцлэх ёстой” гэлээ.