УИХ дахь Ардчилсан намын бүлэг Төрийн ордонд ээлжит бусаар хуралдаж байна. Уг хуралдаанд УИХ дахь Ардчилсан намын бүлгийн гишүүдээс гадна Ардчилсан намын дарга Л.Гантөмөр оролцлоо.

УИХ-ын гишүүн О.Цогтгэрэл “Ардчилсан нам Үндэсний бодлогын хороогоороо намын даргаа сонгож, Их хурлаараа ёсчлон батламжилж, Улсын Дээд шүүхэд бүртгэгдсэн даргатай болсон. Ийм учраас Ардчилсан намын УИХ дахь намын бүлэг ээлжит бусаар хуралдлаа. Бүлгийн хурлаар хоёр асуудлыг хэлэлцсэн. Өнгөрсөн гурван жилийн хугацаанд Ардчилсан намд үүссэн ойлгомжгүй байдал Монгол төрийн асуудал болж үргэлжилсэн. Энэ асуудал цэг тавигдлаа. Эв нэгдлийн талд бат зогсож, хүлээцтэй хандсан намын гишүүддээ баярлалаа. Ажлын үр гарсан онцгой өдрийн мэндийг ард түмэндээ тусгайлан хүргэмээр байна. Ардчилсан намын асуудалд ард түмэн санаа зовж, зовниж байлаа. Шинэ намын даргад өндөр хариуцлага ноогдож байна. Ардчилсан намын бүлэг шинэ дарга бүрэн дэмжиж ажиллах болно” гэв.