Сэлэнгэ аймаг Мандал сумын  III сургуулийн сурагчид үдийн цайндаа хорджээ. Тодруулбал, энэ сарын 4-нд буюу өнгөрсөн баасан гарагт тус сургуулийн 30 сурагч хоолны хордлого авч сумынхаа нэгдсэн эмнэлэгт хандсан байна. Одоогийн байдлаар 26 хүүхэд хэвтэн эмчлүүлж байгаа бөгөөд гурван хүүхдийн биеийн байдал хүнд байгаа аж. Хүүхдүүдэд халуурах, гэдэс нь базалж өвдөх, бөөлжих, гүйлгэх зэрэг шинж тэмдэг илэрч байгаа гэнэ. 

Энэ талаар хордлого авсан сурагчийн ааваас тодруулахад “Зургаан настай хүүхэд маань үдийн цайнд муухай амттай, өмхий үнэртэй хоол өгсөн. Биеийн байдал нь дээрдэж байгаа. Манай хүүхдийн гэдэс өвдөж, бөөлжсөний улмаас бид өнгөрсөн баасан гарагт эмнэлгийн байгууллагад хандсан. Хордлого авсан хүүхдүүд ч бас амралтын өдрүүдээр эмнэлэгт хандсан юм билээ. Харин өчигдрөөс эхлээд хүүхдүүд нэмэгдээгүй. Хүүхдийн аюулгүй байх орчин хангалтгүй байгаад гомдож байна. Мөн “Үдийн цай” хөтөлбөрийн хоол, цайг мэргэжлийн тогооч хийж байгаа эсэхийг тодорхой болгох хэрэгтэй. Сургуулийн эмч, зохион байгуулагчид хяналтаа сайн тавих ёстой шүү дээ” гэлээ.

Харин албаны хүний хэлж буйгаар “Сурагчдаас бактерологийн шинжилгээ авсан байгаа. Шинжилгээний хариу маргааш гарна. ЗДТГ-аас уг хордлого илэрсэнтэй холбогдуулан урьдчилан сэргийлэх арга хэмжээ авч эхэлсэн” гэв.