М.Цэнгүүн дөнгөж зургадугаар  ангийн сурагч хэдий ч бяцхан биедээ баймгүй их тэсвэр тэвчээр гаргаж, шаргуу хөдөлмөрлөсний үр дүнд усан сэлэлтийн дэлхийн хошой аварга боллоо. Өнгөрсөн жил тэрбээр Словени Улсын Блед хотноо болсон усан сэлэлтийн Дэлхийн аварга шалгаруулах тэмцээнээс эх орондоо анхны алтан медалийг авчирч байлаа. Тэгвэл энэ удаа амжилтаа бататгаж,  АНУ-ын Вашингтон ДС хотод болсон усан сэлэлтийн Дэлхийн аварга шалгаруулах тэмцээний 11-15 ангилалд алтан медаль хүртлээ.

        Бид түүнийг энэ удаагийн “Монголын гэрэлт ирээдүй” буландаа урьж, цөөн хором  ярилцлаа.

-Сайн уу. Усан сэлэлтийн ДАШТ-ий хошой аварга болсонд баяр хүргэе. Баярын сэтгэгдлээ манай уншигчдад хуваалцаач?

                -Миний ярилцлагыг уншиж буй ах, эгч нар болон найзууддаа энэ өдрийн мэнд хүргэе. Энэ жил сандрал арай бага, илүү туршлагатай оролцлоо. Дэлхийн тамирчдаар “Монгол Улсын бяцхан тамирчин” гэж дуудуулах хамгийн сайхан байсан. Шагналыг тавцанд зогсохдоо яагаад ч юм маш их сандарсан. Тэгээд намайг дэмжиж байсан нийт монголчууд, гэр бүл, багш нартаа баярлалаа.

-Хэдэн хэмийн хүйтэн усанд сэлсэн бэ?

                -АНУ-ын хэмжүүрээр +15 хэм, манай улсынхаар +3 хэмийн хүйтэн байсан. Нэмэх градус гэж сонсохоор гайгүй сонсогдож байгаа орон сууцны хүйтэн уснаас  тав дахин хүйтэн байдаг. Өнгөрсөн жил далайн усанд сэлсэн бол энэ удаа усан сангийн усанд сэлсэн дээ.

-Усан сэлэлтийн спорт руу өвөө нь хөтөлсөн гэдэг байх аа ?

                -Тийм ээ. Өвөө маань хүүхэд байхаасаа л усан сэлэлтээр хичээллэсэн, маш мундаг тамирчин байдаг. Би хичээллэж эхлэхээсээ өмнө өвөөгөө бэлтгэлдээ явахад нь дагаж явдаг. Тэгж явсаар л энэ спортод дурласан даа. Өвөөтэйгөө хамт тэмцээнд явахад түшигтэй сайхан байдаг. Өвөө маань их залуухан харагддаг болохоор бусад орны тамирчид “Аав чинь хэдэн медаль авсан бэ” гэж асуудаг. Би “Манай өвөө юм аа” гэж хариулахаар их гайхдаг шүү. 

                Би хоёр хүүхэдтэй айлын том нь. Дүү маань гуравдугаар анги ч маш сайн сэлж байгаа. Удахгүй өвөө, дүү хоёртойгоо хамт тэмцээнд явах байх аа.

-Усан сэлэлтийн спорт  тэр тусмаа мөстэй хүйтэн усанд сэлэлтийн төрөл хэцүү шүү дээ. Хүндрэлтэй зүйл гарч байна уу?

                -Анх бол орохоос эмээдэг байсан. Одоо бол дасаад, сэтгэл зүйгээ бэлдээд л ордог болсон доо. Би усан сэлэлтээр хичээллээд илүү эрүүл чийрэг биетэй болсон. Өнгөрсөн таван жилд бараг 2-3 удаа л ханиад хүрсэн байх.

-Тэмцээнийхээ бэлтгэлийг  хэрхэн хийдэг вэ. Анх хэр хурдан сэлж сурсан бэ?

    -Би долоо хонгийн зургаан өдөр нь усанд сэлэлтийн бэлтгэл хийдэг. Гэхдээ одоо сургуульдаа явах хэрэгтэй учраас гурван өдөр нь бэлтгэл хийнэ. Анх сэлж сурахдаа сандарч, эвгүй санагдаж байсан. Тэгээд байнга ороод байхаар дасчихдаг юм билээ. Би дөрвөн жилийн турш мэлхий сэлэлтээр хичээллэж байгаа. Өөр төрлийн сэлэлтийн  техник байдаг ч мэлхий сэлэлтийн техникийг илүү сайн сурахаар хичээж байгаа. Хэдий дөрвөн жилийн турш энэ сэлэлтээр хичээллэж байгаа ч бүрэн гүйцэт эзэмшиж чадаагүй юм шиг санагддаг.

-Ирээдүйн мэргэжлээ сонгосон уу. Усан сэлэлтийн спортоор үргэлжлүүлэн хичээллэх үү?

                -Би эмч болохыг мөрөөддөг. Бас спортоороо би ямар амжилтад хүрч чадахаар байна тэр хүртлээ явна аа. Аав, ээж хоёр маань “Миний охин хүссэн зүйлээ хий” гэж үргэлж дэмждэг.

-Ярилцсанд баярлалаа.

                -Баярлалаа.