• Өнөөдөр 2021-11-30

Б.ГЭРЭЛ: Олон улсын химийн олимпиадаас анхны мөнгөн медалийг эх орондоо авч ирсэндээ баяртай байна

2021-08-07,   379

              Олон улсын химийн олимпиадаас мөнгөн медаль хүртсэн Б.Гэрэлтэй ярилцлаа. Тэрбээр олон улсын химийн олимпиадаас эх орондоо анхны мөнгөн медалийг авч ирээд байгаа билээ. “Ирээдүйд химийн шинжлэх ухааны эрдэмтэн болох мөрөөдөлтэй” хэмээн ярих түүний ярилцлагыг хүргэж байна.
 
-Олон улсын химийн олимпиадаас эх орондоо анхны мөнгөн медалийг авч ирсэнд баяр хүргэе. Хэд дэх жилдээ олон улсын олимпиадад оролцож байна вэ?
 
                -Баярлалаа. Би наймдугаар ангиасаа эхэлж дүүрэг, нийслэл, улсын химийн олимпиадад оролцож эхэлсэн. Харин энэ жил анх удаа олон улсын химийн олимпиадад орсон. Тэгээд мөнгөн медаль хүртсэн. Тусалж дэмжсэн бүх хүмүүстээ баярлалаа.
 
-Монгол Улс түүхэндээ анх удаа олон улсын химийн олимпиадаас мөнгөн медаль хүртэж байгаа гэж дуулсан. Тэгэхээр энэ түүхийг бүтээж чадсан өөрөөрөө болон багшаараа бахархаж байгаа болов уу?
 
                -Тиймээ, манай улс түүхэндээ анх удаа химийн олон улсын химийн олимпиадаас мөнгөн медаль хүртсэн.
 
Өмнө нь ах, эгч нар маань дандаа л хүрэл медаль хүртэж байсан юм билээ. Тиймээс Монгол Улсаа олон улсад таниулж, анхны мөнгөн медалийг авч ирсэндээ баярлаж байна.
 
Миний багшийг Б.Оюубат гэдэг. Багшдаа их баярлаж явдаг. Элсэлтийн ерөнхий шалгалтад хүүхэд бэлдэж байгаа ч гэсэн намайг олимпиадад сайн бэлдсэн. “Багшаа хоёулаа чадсан шүү” гэж хэлмээр байна.
 
-Дүн гарахыг хүлээсэн хэдэн өдөр сэтгэл зүйн хувьд догдлол, айдсаар дүүрэн байсан уу?
 
                -Тиймээ, анх багш маань “олон улсын олимпиад их хүнд. 60-70 хуудас материал ирдэг. Таван цаг бодлого боддог” гэж хэлэхэд нь “пөөх, тийм хэцүү юм байхдаа, орж үзэх юмсан” гэж боддог байсан. Тэгээд яг олимпиадад ороод бодлогоо бодохоор таван цаг их бага юм билээ. Нэг мэдэхэд л сүүлийн 10 минут үлдсэн байсан. Тэр хугацаанд миний нэг мэддэг бодлого байсан. Түүнийг бодох гэхээр цаг амждаггүй. “Тэгээд би энэ бодлогыг эхлээд бодсон бол оноо илүү авах байж дээ” гэж бодсон. Тэгээд гурав хоногийн дараа олимпиадын дүн гарч, олимпиадын хорооны багш болон ээжтэйгээ хамт байхдаа медаль авснаа мэдсэн. Тэр гурав хоногийн хугацаа их хэцүү байсан. “Би сайн хийсэн болов уу, хэдэн оноо авсан бол” гээд л олон зүйл бодсон.
 
-Цахимаар олимпиадад оролцох нь ямар онцлогтой вэ?

 

                -Эх орноосоо оролцож байгаа болохоор сэтгэлзүйн хувьд тайван, амгалан байсан. Мөн хоол таарахгүй, цагийн зөрүү гэх мэт асуудлууд тулгараагүй нь сайнаар нөлөөлсөн болов уу. Энэ жил олон улсын химийн олимпиадыг Япон Улс зохион байгуулж байгаа. Их наран Улсын түүх, өв соёлтой танилцаж, олон улсын хүүхдүүдтэй танилцаж чадаагүй нь харамсалтай санагдсан.

-Химийн хичээлийг гүнзгийрүүлж судлахад юу хамгийн их нөлөөлсөн бэ?
 
                -Би зургадугаар ангиасаа эхэлж химийн хичээл үзсэн. Гэхдээ химийн хичээлдээ дунд дүн л авдаг байлаа. Тэгээд наймдугаар ангидаа Б.Оюубат багштай уулзаж, хичээл заалгуулснаар химийн хичээлдээ дуртай болж, ойлгож эхэлсэн.
 
-Багшийнх нь заах аргын онцлог нь юу байсан бэ?
 
                -Химийн хичээл өөрөө олон салаалдаг. Тэр бүрийг нь нарийн судалж, бодлого бодох нь их гоё гэдгийг манай багш ойлгуулсан. Б.Оюубат багш маань эхлээд маш сайн тайлбарлаж өгдөг. Дараа нь өөрөө хийж үзэх боломж олгоод чадахгүй бол ахиад аргаа өөрчилж, тайлбарлаж өгдөг. Олон гоё, хөгжилтэй жишээ авч тайлбарладаг болохоор би химийн хичээлдээ дуртай болсон.
 
-Б.Гэрэл маань ямар зан төлөвтэй хүүхэд вэ?
 
                -Би бага байхаасаа л даруухан охин байсан. Одоо ч мөн даруухан. Бусдаар бол содон ааш зангүй хүүхэд шүү.
 
-Ирээдүй нь зорилгоосоо хуваалцаач?
 
                -Би эхний ээлжид 12 дугаар ангиа амжилттай төгсөөд, химийн шинжлэх ухааны эрдэмтэн болно. Тэгээд бусад хүмүүсийн адилаар гэр бүлтэй болж энгийн аз жаргалтай амьдрахыг зорьдог.
 
-Ярилцсанд баярлалаа.
 
                -Баярлалаа. Мөн намайг өдий зэрэгтэй хүн болгож сурах бүх боломжоор хангаж өгсөн аав, ээждээ болон багш Б.Оюубат, Монголын олимпиадын хорооны багш нартаа баярлалаа.

Б.ГЭРЭЛ: Олон улсын химийн олимпиадаас анхны мөнгөн медалийг эх орондоо авч ирсэндээ баяртай байна
АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 2
  • Сэтгэгдэл үлдээсэн: 2021-08-10 08:20:13
    Сараа: Багш,шавь хоёрт баяр хүргэе.Ирээдүйд эрдэмтэн болох зорилгынхоо төлөө цуцалтгүй сураарай .
  • Сэтгэгдэл үлдээсэн: 2021-08-08 00:17:50
    Би монгол хүн: Баяр хүргэе, сонирхолтой аргаар заасан багшид нь мөн баяр хүргэе. Номын цагаан мөр өнөд ивээх болтугай.
Шинэ мэдээ
Нийтлэлчид
Монгол Улс, Улаанбаатар хот, Сүхбаатар дүүрэг, VIII хороо, "Ардын эрх"-ийн байр, Гуравдугаар давхарт Эргэлт.мн редакц
7509-1188