Хүн хайр хайж, дагаж, хайр тийш нүүж амьдардаг. Бодоод үздээ, хайрыг эрж явна гэхээр тэнд ямархан орчин ахуй, ертөнц оршиж байгааг. Аримун продакшны хоёр дахь уран бүтээл “Хүний ээж” кино эл санааг энэ удаад  үзэгчдийн оюун санааны “өлгүүрт” өлгөж чаджээ.

           Монгол Улсын Гавьяат жүжигчин Д.Ганцэцэгээр ахлуулсан хоёр гишүүнтэй энэ продакшнаас чамбай бүтээл часхийтэл төрдгийг анхны кино болох “Халуун зүрх” -ээс харсан. Бүр түүнээс ч өмнө “Хувьсал” продакшнд байхдаа үзэгчдэд хүргэсэн “Зэрлэг цэцэгсийн хүлэмж”, “Атганд үлдсэн эрдэнэ” киноноос ч үзэж байв. Түүнд тийм нэг өөрийн гэсэн уран бүтээлийн тогтоц, өнгө аяс, сэтгэлгээ байдаг. Тэр үргэлж бүрэн дүүрэн ажиллаж, гаргаж байгаа бүтээл бүр нь сэтгэл зүрхнээсээ байдгийг үзэгчид андахгүй ээ. Тэгвэл найруулагчаар нь ажилласан “Хүний ээж” кино ч ялгаагүй түүний хайрлаж, хамаг сэтгэлээ дэлгэсэн үр хүүхэд шиг нь бүтээлийнх нь нэг болж. Нэг өөр нь тэр энэ удаад зохиолыг нь бичээгүй, түүний дэргэд түшиж, ургаж, суралцаж байдаг алтан хамтрагч жүжигчин А.Ганчимэг зохиолыг нь бичиж, продюсераар нь ажилласан нь үзэгчдэд шинэ онцлог байлаа.

     Эрх танхи мөртлөө хэрсүү охины дүрээр үзэгчдийн хайрыг татаж байсан тэр өдгөө харин уран бүтээлчийн хувьд өсөн торниж, өөрийнхөө дотор бодож, үзэгчдэд хүргэх сэн гэх санаагаа бүтээл болгоод дэлгэлээ. Ийн хоёр Ганаагийн итгэл, сэтгэл нийлсэн бүтээл үзэгчдэд хүрч эхэллээ. А.Ганчимэг эл бүтээлийнхээ талаар “Хүн энэ хорвоод төрөөд аз жаргалтай сайхан амьдрахын төлөө бид цэцэг цэврүү шиг хүүхдүүдийг хорвоо дэлхий дээр авчирдаг. Тэгэхээр хүүхдүүдийнхээ төлөө, үнэн сайхан аав, ээж байхын төлөө, энэ ертөнцөд амьдарч байгаа учир бүх хүн ижил хайраар хайрлагдаж байгаасай, хэн ч хайраас холуур битгий байгаасай гэж кино зохиолоо бичсэн” гэсэн. Нээрээ хайраас хол “шидэгдэж”, хайрын гадна “унах” хүн бишгүй бий. Тийн унаж, шидэгдэн өвдгөө шалбалж, хаачих замаа олохгүй бүдчих нэгнийг замын дундаас олоод, хайр өгч, гэрэл тусгах нь ч бий. Гэхдээ хэн чин үнэн, аюулгүй хайрладаг билээ. Үүнийг "Хүний ээж" киног үзсэн хэн бүхэн тунгааж, “Бид чинь нээрээ нэгнээ чин үнэн хайраар хайрлаж чадаж байгаа бил үү” гэж эргэцүүлж, ариун тунгалаг хиргүй сэтгэлээр нэгнээ хайрлаасай. Түүнээс хайр хайж, гуйж, хайрыг хүчээр авагч, өгөгч битгий байгаарай гэдгийг тэдний бүтээлтэй хамтатган бид ч мөн хэлэх байна.

     Гарт баригдаж, нүдэнд харагдахгүй хайр гэгч тэр зүйл өөрөө хүний зүрх сэтгэлээс горхины ус шиг хоржигнон ундарч, тийм тунгалаг цэнгэг уснаас амссан нэгний ухаан санаа сэргэж, улам ч тэлж байдаг. Тэгэхээр хайрыг хэн ч битгий хайгаасай, хайр хэн бүхнийг тэнцүү ивээж, хэнээс ч дөлж битгий зугтаасай гэсэн амин санааг шингээж чаджээ, “Хүний ээж” кино. Аав, ээж нь хүртэл хүнийрхүү болдог жигтэй ертөнц бий шүү дээ. Хорвоод ирээд хэдхэн сар, жил болж буй үр хүүхдээ зодож, гэмтээж, тарчлаасаар буцаадаг жишээ ч бидний дунд олон. Тийм л болохоор хайр хайж, зовж тарчлан өсдөг. Хайр дутуу, дутуу тэр зүйлээ харь хөндий бусдаас хайж яваа гэхээр л дэндүү харгис, хатуу ертөнц бидний өмнө сүндэрлэдэг гэж санана. Зүгээр л бүх зүйл харанхуй, юу ч харахгүй мэт л болно. Заримдаа харах ч зовлон байдгийг тэнд мэдэрнэ. Хайрлаарай л гэж хэлээд байна, тэд.

/АРИМУН ПРОДАКШНЫ "ХҮНИЙ ЭЭЖ" КИНОГ ҮЗСЭН ТЭМДЭГЛЭЛ/