Хүйтэн агаар арьсыг хуурайшуулж, улайлт үүсгэдэг гэдгийг мэдэх үү?

Хүйтний улирал арьсны хамгаалалтын давхаргыг сулруулж, амархан чийг алдахад хүргэдэг. Ойрын өдрүүдэд хүйтний эрч эрс чангарсантай холбоотой арьсаа хамгаалж, эрүүл, чийглэг байлгах арьс арчилгааны алхмуудыг танилцуулъя.

Алхам 1: Зөөлөн цэвэрлэгч

Өвлийн хүйтэнд зөөлөн чийгшүүлдэг цэвэрлэгч бүтээгдэхүүн хамгийн тохиромжтой байдаг. Арьсыг хуурайшуулалгүй шөнийн турш хуримтлагдсан бохирдлыг арилгах хөнгөн цэвэрлэгээ хийж эхлээрэй. Оройдоо тосон цэвэрлэгч ашиглаж нүүрний будалт, нарны хамгаалалт болон бусад бохирдлыг арилгана.

Алхам 2: Toner

Нүүрээ цэвэрлэснийхээ дараа toner хэрэглэх нь арьсыг тайвшруулж, чийгшүүлж дараагийн арчилгаанд бэлтгэдэг. Мөн арьсны PH-тэнцвэрийг сэргээж, серум, тосны шингээлтийг сайжруулна.

Алхам 3: Serum

Гиалуроны хүчил агуулсан серум нь арьсыг чийгшүүлж, зөөлөн жигд болгодог. Мелатонин,  витамин С агуулсан сэрум нь өвлийн улиралд илүү тохиромжтой.

Алхам 4: Зовхины тос тогтмол хэрэглэх

Нүдний эргэн тойрны арьс нимгэн, эмзэг тул өвлийн хуурай агаар жижиг үрчлээ болон ядарсан төрхийг тодруулж харагдуулдаг.  Hyaluronic acid (Гиалуроны хүчил)-тэй зовхины тос ашиглах хэрэгтэй. Учир нь гиалуроны хүчил нь  арьсыг чийгээр ханган, арьсны эргэн тойрондох жижиг үрчлээг багасгадаг.

Алхам 5: Moisturize (чийгшүүлэх тос)

Чийгшүүлэх нь эрүүл, толигор арьсны үндэс. Тиймээс өглөө, орой бүр арьсандаа тохирсон чийгшүүлэх тос түрхэхээ мартуузай.

Алхам 6: Sunscreen (нарны тос)

Хүйтэн ч гэсэн нарны гэрэл арьсыг гэмтээж, хөгшрөлтийг түргэсгэдэг.  Нарны тосыг өдөр тутамдаа байнга хэрэглэх дадлыг суулгах нь зөв юм.

Арьсаа зөв алхмаар арчлах нь чухал ч гэсэн дотроосоо ч мөн арчилгаа шаарддаг. Өдөрт хоёр литр ус уух, хоол хүнсэндээ амин дэм агуулсан бүтээгдэхүүн хэрэглэх.

Хүйтэн өдөр халуун шүршүүрт орох сайхан санагддаг ч энэ нь арьсны байгалийн тослогийг арилгаж, улам хуурай болгодог. Иймээс бүлээн ус хэрэглэж, шүршүүрт орох хугацааг 10-15 минутаас хэтрүүлэхгүй байхыг зөвлөе.

М.ЖАРГАЛМАА