Дэлхийн кино урлагийн академиас жил бүр уламжлал болгон зохион байгуулдаг, кино урлагийн салбарын оны шилдгүүдийг шалгаруулдаг “Оскар” наадам 93 дахь удаагаа ирэх дөрөвдүгээр сарын 25-нд болно. Наадмын санал хураалт ирэх сараас эхлэх бөгөөд кино урлаг судлаач, сонирхогчдын гаргасан дүгнэлтээр 21 кино шилдэг нь байж, гол өрсөлдөөн тэдний дунд өрнөх гэнэ. Кино судлаач, сонирхогчдын “Оскар-2021” наадмын шилдгээр нэрлээд буй 21 киноноос 10-ыг нь бид өчигдөр танилцуулсан. Тэгвэл өнөөдөр үлдсэн 11 киног нэрлэж байна.

Өмнөхийг нь үзэх бол эндээс үзээрэй...

11. "Сүнс”

       Алдартай жазз хөгжимчин болох хүсэлтэй дунд сургуулийн хөгжмийн багш Жое Гарднерт өөрийн хөгжимчний карьераа эхлүүлэх боломж гарч ирснээр анимэйшний гол үйл явдал эхлэх аж. Судлаачдын үзэж буйгаар тус анимэйшн нь “Шилдэг анимэйшн” төрөлд “Оскар”-ын шагнал хүртэх асар өндөр боломжтой аж. Мөн “Шилдэг зураг” номинацид анимэйшн шалгарч байгаагүй ч судлаачид “Сүнс” анимэйшнийг уг номинацид шалгарч, шагнал хүртэл магадлалтай хэмээн үзэж байна.

12. "Юдас ба хар Мессиа”

      Өнгөт арьстнуудын гэмт хэргийн бүлэглэл болон түүний харизматик удирдагч Фред Хэмптоны Холбооны мөрдөх товчоонд нэвтрэхийг оролдсон тухай түүхийг Шака Кинг найруулан дэлгэцийн бүтээл болгожээ. “Алтан бөмбөрцөг” кино наадмаас шагналгүй буцсан тул уг кинонд үзэгчид хүлээлт үүсгэхээ больсон ч кино шүүмжлэгчдийн үзэж буйгаар “Оскар-2021” наадмын хэд хэдэн номинацид нэр дэвшиж, шагнуулах боломжтой гэнэ. Уг кино энэ сараас эхлэн кино театруудад гарах аж.

13. "Дэлхийн мэдээ”

       “Оскар”-ын хоёр удаагийн шагналт, өнөө цагийн шилдэг жүжигчдийн нэг Том Хэнкс уг кинонд хотоос хот дамжин дэлхийн мэдээг хүргэж яваа ахмад дайчны дүрийг бүтээжээ. Хот дамжин яваа ахмад дайчин дайны хөлд өнчирсөн нэгэн охинтой танилцана. Улмаар охиныг аюулгүй газарт хүргэхээр шийдэж, хамт аялж буй түүхийг өгүүлэх гэнэ. Жүжигчин Том Хэнкст дахин “Шилдэг эрэгтэй гол дүр”-ийн шагнал авах боломж байгаа бөгөөд тус киноны найруулагч Пол Гринграссыг “Шилдэг найруулагч” номинацид дэвшүүлэх аж. “Дэлхий мэдээ” кино өнөөдрөөс эхлэн үзэгчдийн хүртээл болох юм.

14. "Аав”

       Нэрт жүжигчин Энтони Хопкинсийн дүр бүтээсэн 80 настай өвгөн өдөр өдрөөр ой санамжаа алдаж буйгаар киноны үйл явдал эхлэх аж. Судлаачид хэрэв 83 насыг зооглож буй Энтони Хопкинс “Шилдэг эрэгтэй туслах” дүрийн шагналд нэр дэвшвэл хамгийн өндөр насандаа академийн шагналд нэр дэвшсэн болж түүхэнд үлдэж, улмаар тухайн шагналыг хүртэх боломжтой гэнэ.

15. "Амьдрал үргэлжилсээр”

       Амьдралынхаа турш биеэ үнэлж, хоногийн хоолоо олж иддэг байсан эмэгтэй нэгэн өдөр өнгөт арьст өнчин хүүтэй учирснаар өөрөөсөө алдсан, тойрч өнгөрсөн бүх зүйлээ эргүүлэн олж авч байгааг уг кинонд харуулсан гэнэ. Тус киноны гол дүрийн эмэгтэйн сэтгэл хөдлөл, зан араншинг маш сайн гаргаж чадсан хэмээн үнэлэгдээд буй жүжигчин София Лорен “Оскар-2021” кино наадмын “Шилдэг эмэгтэй гол дүр”-ийн шагналыг хүртэх магадлалтай аж.

16. "Малколм, Мэри хоёр”

       “Хайр сэтгэлд арьс өнгөний ялгаа ямар ач холбогдолтой вэ” гэх асуултад хариулах, хосын ээдрээт амьдралын талаар тус кино өгүүлдэг аж. Киноны гол дүрд тоглосон жүжигчин Зендаяа “Хүн аалз” кинонд тоглосноос хойш олны танил болоод зогсохгүй өнгөрсөн жилийн “Эмми” шагнал гардуулах ёслолын шилдэг жүжигчнээр шалгарсан. Энэ удаад ч мөн Зендаяагийн амжилт үргэлжилж, “Оскар-2021” наадамд нэр дэвшиж, шагнал хүртэх боломжтой хэмээн судлаачид үзсэн юм.

17. "Билли Холидэйн эсрэг Америк”

       Уг киногоор Америкийн нэрт дуучин Билли Холидэй гэгч эмэгтэйг хар тамхины хэргээр тус улсын Засгийн газраас хэрхэн мөрдөн байцааж, шалгалтын ажиллагаа явуулж байгааг харуулах гэнэ. Кино шүүмжлэгчид дуучин Билли Холидэйн дүрийг бүтээсэн Диана Росс “Оскар-2021” наадмын “Шилдэг эмэгтэй гол дүр”-ийн шагнал авах боломжтой хэмээн үзэж байна.

18.  "Хиллбилли Элеги”

      Хуулийн чиглэлээр сурдаг нэгэн оюутан гэр бүлийн эмэгтэй гишүүдтэйгээ маш их зөрчил, хагарал үүсгэж байснаа ойлгож, түүнийгээ засахаар хичээнэ. Хэдий уг кино “Алтан бөмбөрцөг” кино наадамд нэр дэвшиж, багагүй нэр хүнд олоод байсан ч шүүмжлэгчид уг кинонд сайн үнэлгээ өгөөгүй аж. Гэсэн хэдий ч үзэгчдийн дунд дуулиан тарьсан тус кино “Оскар-2021”-ээс дор хаяж нэг төрөлд шагнал авна гэдэгт бат итгэлтэй байгаагаа үзэгчид цахим сүлжээгээр дамжуулан кино сонирхогчидтой хуваалцжээ.

19. "Аммонит”

       XIX зууны үед амжилттай ажиллаж явсан палеонтологич, геологич нарын хамтран бичсэн романаас сэдэвлэн уг киног бүтээжээ. Кино багаас "Гол дүрүүдэд тоглосон Кейт Уинслет, Саоурсе Ронан, Жемма Жонс, Жеймс МакАрдл зэрэг жүжигчид шилдэг гол дүр болон туслах дүрүүдийн номинацид нэр дэвших боломжтой" хэмээн мэдэгдсэн байна.

20. "Мавритани”

       Хийгээгүй хэрэгтээ сэжигтнээр татагдсан нэгэн залуу шүүгчдийн буруутай үйлдлийн улмаас хорих анги руу шилжсэнээр “Мавритани” киноны гол үйл явдал эхэлнэ. Шүүмжлэгчид уг киног нээлтээ хийсний дараа ам сайтай байсан ч “Алтан бөмбөрцөг”-ийн кино наадмаас шагнал хүртэж чадаагүй юм. Гэсэн хэдий ч энэ нь “Оскар-2021” наадамд муу амжилт үзүүлнэ гэсэн үг биш.

21. "Боратын дараагийн кино”

       Казахстаны зохиолч, сэтгүүлч Борат хэмээх эр 2020 оны Ерөнхийлөгчийн сонгуульд нэр дэвшихээсээ өмнө охины хамтаар Америк руу аялахаар төлөвлөж, кино эхэлнэ. Боратын охины дүрийг жүжигчин Мария Бакалова үзэгчдэд таалагдахуйц өхөөрдөм, хөгжилтэй байдлаар бүтээсэн нь “Шилдэг эмэгтэй туслах дүр”-ийн шагналыг хүртэхэд хүргэж магадгүй гэнэ.