Засгийн газрын хуралдаанаар хэлэлцсэн асуудлын талаар ЗГХЭГ-ын дарга Н.Учрал мэдээлэл хийлээ.

          Тэрбээр "Засгийн газрын хуралдаанаар үүсмэл ордууд дээр авч хэрэгжүүлэх Засгийн газрын тогтоолын төслийг баталлаа. Ашигт малтмалын тухай хуульд стратегийн орд болон үүсмэл ордын 34 болон 50 хүртлэх хувийг төр үнэгүй эзэмшнэ гэсэн заалт бий. Өнгөрсөн хугацаанд үүсмэл ордыг бусдад ашиглуулахдаа ямар нэг нээлттэй сонгон шалгаруулалтгүй ашиглуулдаг байдал байсаар ирсэн. Өнөөдрийн хуралдаанаар үүнийг таслан зогсоож, уурхайг түшиглэсэн үүсмэл ордыг ашиглахдаа нээлттэй сонгон шалгаруулалт зарлаж, сонгон шалгаруулалтын дагуу гэрээ байгуулаад, гэрээний үндсэн дээр ашигладаг байхаар эрх зүй орчинг бүрдүүлж байгаа юм.

      Стратегийн ордыг түшиглэсэн үүсмэл ордын төрийн эзэмшлийн 34 хувийг тогтоох тогтоолын төслийг албажууллаа. Өмнө нь бид Эрдэнэт үйлдвэрийг түшиглэсэн гурван үүсмэл орд буюу "Ачит-Ихт" "Зэс эрдэнийн хувь",  "Эрдмин" гэсэн гурван ордын үйл ажиллагаатай танилцсан. Өнөөдрийн хуралдаанаар Үндэсний баялагийн сангийн хуульд заасан төр эзэмшлийнхээ 34 хувийг тогтоож, Засгийн газарт танилцуулсан. Шаардлагатай бол УИХ дээр танилцуулна. Мөн өнгөрсөн хугацаанд Эрдэнэт үйлдвэр өөрийнхөө овоолго буюу үүсмэл ордыг өөрөө ашиглах төсөл хэрэгжүүлэхээр төлөвлөж байсан. Өнөөдрийн Засгийн газрын тогтоолоор үүнийг хүчингүй болгож, төр хувийн хэвшилтэй өрсөлдөхгүй гэдэг зарчмаа баримталж, тухайн овоолгыг ашиглаж байгаа компани нээлттэй сонгон шалгаруулалтад орж, гэрээний дагуу төр 34 хувиа эзэмшиж, Үндэсний баялагийн сандаа төвлөрүүлэх байдлаар явах эрх зүйн орчныг бий болголоо. Одоо хэлэлцээрийн ажил үргэлжилж байгаа. Хоёр долоо хоногийн дараа шийдвэрийг танилцуулна" гэлээ.