МЗЭ-ийн шагналт зохиолч, орчуулагч, профессор Н.Пүрэвдагвын жүжгийн болон кино зохиол, дэлхийн сонгодог жүжгүүдийн орчуулга, зарим тэмдэглэл, эргэцүүлэл, нийтлэлээс бүтсэн "Жүжиг, тэмдэглэл, эргэцүүлэл" ном шинээр мэндэлжээ.

Энэхүү ном нь зохиол, ОРЧУУЛГА, ТЭМДЭГЛЭЛ, ЭРГЭЦҮҮЛЭЛ, ТУХАЙ гэсэн дөрвөн гол хэсгээс бүрдсэн байна.

          Тэрбээр номынхоо өмнөх үгт "...Өнгөрсөн 13-14 жилд хийснээ тэмтэрлээ. Найруулагч Б.Баатарын хүсэлтээр "Амьгүй албат"-аар эхэлсэн роман, найраглал, өгүүллэгээс сэдэвлэн жүжиг бичих оролдлогоо үргэлжлүүлжээ. Тухайлбал, шинэ залуу найруулагч М.Батболдын захиалгаар германы агуу уран бүтээлч Гётегийн "Фауст" найраглалыг жүжиг болгон хөрвүүлж. Дараа нь Улсын драмын эрдмийн театр, найруулагч Н.Наранбаатарын захиалгаар Л.Толстойн "Анна Каренина" романыг "Анна Каренина буюу бүтэлгүй хайрын дууль" хэмээх жүжиг болгосон байх юм. Жүжиг ч орчуулжээ. Заримаас дурдвал Л.Н.Толстой "Холстомер" өгүүллэгээс сэдэвлэн М.Розовскийн бичсэн "Адууны түүх", Б.Шоу "Пигмалион", Морис Метерлинк "Хөх шувуу". Белгийн зохиолч Морис Метерлинк, Англи-Ирландын зохиолч Б.Шоу хоёр бол жүжгийн зохиолоор Нобелийн шагнал авсан анхдагчид гэдгээрээ онцлог. Энэ эмхэтгэлд орж байгаа ихэнх жүжиг тайзны бүтээл болжээ..." гэсэн байна.

      Ингээд уншигч та бүхэнд тус номын агуулгад багтсан зохиол, орчуулга, тэмдэглэл, эргэцүүллийн заримаас товч танилцуулъя.

ЗОХИОЛ АГУУЛГЫН ЭХНИЙ ЖҮЖИГ БОЛОХ  "АМЬГҮЙ АЛБАТ" /Н.В.Гоголь "Амьгүй албат" найраглалаас сэдэвлэсэн жүжиг/

                Энэхүү жүжиг нь гурван бүлэгтэй бөгөөд эхний бүлэг нь гурван үзэгдэл, хоёр, гуравдугаар бүлэг нь тус бүр таван үзэгдэлтэй байна.

          Гуравдугаар бүлгийн хоёрдугаар үзэгдлийн хэсгээс:

                        "...Хязгааргүй цэнхэр огторгуй, хаяалан хөврөх сэмжин үүлнээс өөр юм үл харагдах өргөн тал дундуур Хачиг ноён, бараа бологчдын хамт шогшуулна. Салбаан мөн л нэлээн балгасан бололтой донхолзоно. Сэлбээн зөөлөн урт хар үсээ намируулсан шиг, унжгар хамраа сунган бас ч зүгээргүй бололтой шилбүүрээ тас няс хийлгэн явна..."

ОРЧУУЛГА АГУУЛГЫН ЭХНИЙ ЖҮЖИГ БОЛОХ ЭДУАРДО ДЕ ФИЛИПП "ГЭРИЙН ТУЛГА-ГАЛЫН БУРХАН"

       Түүний гурван үзэгдэлт жүжгийн хэсгээс:

              "...Зуны гэмээр хаврын үдэш. Тухайн өдрийн хаврын сүүлийн туяа гудмын мандлаас аажмаар үгүй болж байлаа. Филумена Мартурано унтлагын өрөөний үүдээр цээжин дээрээ хоёр гараа зөрүүлэн бариад хэвтэж байгаа нь харагдана. Үсээ самнаагүй гараараа л илсэн бололтой. Нүцгэн хөлөндөө гэрийн шаахай хийжээ. Энэ эмэгтэйн нүүрэнд хүнд хүчир, зовлонт амьдралын ул мөр тод харагдана..."

ТЭМДЭГЛЭЛ, ЭРГЭЦҮҮЛЭЛ АГУУЛГАД:

• Тувад зорчсон тэмдэглэл
• Уулсын Алтай бую...
• Зүүн Сөнөдөөр зорчсон тэмдэглэл
• Хүүхдийн уран зохиолын тухай хэдэн үг
• Б.Баатар найруулагчийн тухай хэдэн үг
• У.Шекспирийн "Гамлет" жүжгийн сураг
• Сэлэнгэчүүд хийгээд ардын хувьсгал
• Найруулагчтайгаа ярьж байгаад Анна сүнс гаргаж ирсэн
• Бертольт Брехт номын нээлтийн хурал дээр хэлсэн үг зэрэг тэмдэглэл, эргэцүүлэл багтжээ.​

​

​            Харин номын сүүлчийн хуудсуудад Урлагийн гавьяат зүтгэлтэн, найруулагч Б.Баатарын ярилцлага, номын "Адууны түүх" жүжгийн нээлтийн үеэр хэлсэн үгс болон Л.Түдэв гуайн энэхүү номын эзний тухай өгүүлсэн үгс багтсан байна. 

             Зохиолч, орчуулагч Н.Пүрэвдагвын номынхоо өмнөтгөлд хэлсэн мөн нэгэн үгсийг энд хуваалцъя. Тэрбээр "...Жүжиг бол үнэнээс чухам үнэнийг шигшин үзүүлдэг урлаг. Харин найруулагч, хөгжмийн зохиолч, зураач, жүжигчдийн хамтран үнэний эрэлд мордох сэдэл нь зохиол байдаг. Өөрөөр хэлбэл, тайзны уран бүтээл гэдэг гүн ухааны нэгдэл, цаг хугацаа орон зайн орчилд үзэгчдийг хөтлөн хийдэг танин мэдэхүйн аялалын гараа байдаг гэх зарчмыг баримтлан ийнхүү уншигч танаа хийсэн зарим нэг ажлаа эмхэтгэн өргөн барив..." гэжээ.