Монгол Улсын Төрийн шагналт, Ардын уран зохиолч С.Эрдэнэ Хэнтий аймгийн Биндэр суманд 1929 оны эл өдөр мэндэлжээ. Зохиолч С.Эрдэнэ нь Монголын шинэ үеийн уран зохиолын богино өгүүллэгийн мастер, Орчин цагийн Монголын утга зохиолын “хэл” бүрдэхэд нөлөөлсөн зохиолч, сэтгэлзүйн өгүүллэгийн гарамгай мастер хэмээн алдаршсан утга зохиолын нэрт төлөөлөгч юм.

       Тэрээр 1949 онд офицеруудын сургууль, 1955 онд МУИС-ийг төгсөж, Хий судлалын эмнэлэгт их эмч, “Эрүүл мэнд” сэтгүүлийн эрхлэгч, “Цог”, “Утга зохиол урлаг” сонины эрхлэгч, МЗЭ-ийн хорооны нарийн бичгийн дарга, “Үргэлжилсэн үгийн зохиолын зөвлөл”-ийн эрхлэгчээр ажиллаж байв.

       Түүний амьд ахуй цагтаа хэвлүүлсэн “Амьдралын тойрог”, “Баян бүрд”, “Занабазар”, “Малын хөлийн тоос”, “Наран тогоруу”,  “Хойт насандаа учирна” зэрэг зохиол, бүтээл нь өнөөг хүртэл хадгалагдан үлдэж, хүүхэд, залуусын ширээний ном болжээ. Нэрт зохиолч С.Эрдэнэ 2000 онд тэнгэрийн оронд заларчээ.