“Гүүгл” компани хэвлэл мэдээллийн салбартаа анхаарч олон улсын хэвлэлийн байгууллагуудыг нэгтгэсэн “Ньюс” корпорацын мэдээг төлбөртэй цацах гэнэ. Өнгөрсөн жил “Гүүгл” компаниас платформд нь мэдээлэл оруулж буй нийтлэлч, хэвлэл мэдээллийн байгууллагуудад төлбөр төлнө хэмээн мэдээлж байсан бөгөөд түүний хүрээнд “Ньюс” корпорац “Гүүгл”-тэй гэрээ байгуулсан анхны хэвлэлийн байгууллага боллоо.

       Уг гэрээний талаар “Ньюс” корпорацын гүйцэтгэх захирал Роберт Томсон “Хэвлэл мэдээллийн эрин үе дата сэтгүүл зүй рүү шилжсэнээс хойш манай корпорацын олон жилийн хүсэл энэ байлаа. Энэ гэрээ нь манайхтай холбоотой хэвлэл мэдээллийн байгууллагууд мөн тухайн байгууллагуудын бүх хэвлэн нийтлэгч, сэтгүүлчдэд баярт мэдээ болж байна. “Гүүгл” компанитай байгуулсан хэвлэлийн гэрээ нь цаашид өнөөгийн нийгэм дэх сэтгүүл зүйг илүү өндөр түвшинд аваачиж чадна” хэмээжээ.