Нүүрсний тоосонцор агуулсан агаарын бохирдлын улмаас жилд найман сая гаруй хүн амиа алдаж байгааг судалгаагаар тогтоожээ. Уг судалгааны дүн нь коронавирусийн улмаас амиа алдсан хүний нийт тооноос илүү үзүүлэлттэй байгаа бөгөөд агаарын бохирдол нь цар тахлаас илүү аюул дагуулж байгаа талаар “UCL”-ийн их сургуулийн физик газарзүйн дэд профессор, агаарын бохирдлын судалгааны багийн гишүүн Элоиз Мараис мэдээлсэн юм.

       Нүүрс, газрын тос зэрэг чулуужсан түлшийг шатаахад агаар мандалд нарны цацрагийг хуримтлуулж, уур амьсгалын өөрчлөлт үүсгэх хүлэмжийн хий үүсгэж, PM 2.5 гэж нэрлэдэг хортой тоосонцрыг ялгаруулдаг байна. Бичил хэмжээт тоосонцор уушгины гүн рүү нэвтэрч, астма зэрэг амьсгалын замын өвчнийг хүндрүүлж, уушгины хорт хавдар, зүрхний титэм судасны өвчин, цус харвалтад их хэмжээгээр нөлөөлдөг аж.