Япон Улсад амиа хорлосон 2153 тохиолдол өнгөрсөн сард бүртгэгдсэн байна. Уг тоон үзүүлэлт нь “Ковид-19” вирусээс болж амиа алдсан иргэдээс илүү  байгааг томоохон хэвлэл мэдээллийн байгууллагууд онцолжээ. Тодруулбал, аравдугаар сард тус улсын 2087 иргэн “Ковид-19”-ийн халдвараар өвчилж нас барсан байна. Цар тахлын үед тус улсын Засгийн газраас үр дүнтэй шийдвэр гаргаж чадахгүй байгаад иргэд бухимдалтай байгаа юм. Мөн амиа хорлолт ихсэх болсон нь ажилгүйдэл, коронавирусийн халдвар сэтгэл санаанд нөлөөлж байгаатай холбоотой хэмээн таамаглаж байгаа аж. Амиа хорлолтын хохирогч нь ихэвчлэн  эмэгтэйчүүд  байна.

Улмаар амиа хорлолтын сөрөг үр дагаврыг иргэдэд ойлгуулахын тулд нэгэн эмэгтэй дээр жишээ авчээ. Эрико Кобаяши нь өдгөө 43 настай бөгөөд амьдралынхаа туршид дөрвөн удаа амиа егүүтгэхээр оролдож байсан гэнэ. Анхны оролдлого нь 22 настай хоол, хүнсний төлбөрөө төлж чадахгүйн улмаас амиа хорлохыг завдсан.

Тэрбээр  сэтгэцийн өвчинтэйгөө тэмцэлдэх тухай ном бичиж, ТББ байгууллагад идэвхтэй ажилладаг болжээ. Гэвч саяхан дахин амиа егүүтгэхийг завдаж, “Миний цалин буурсан. Хонгилын үзүүр дэх гэрлийг харж чадахгүй байна. Ядууралд өртөж магадгүй гэх мэдрэмж надаас салахаа болилоо” хэмээн шалтгаанаа тайлбарласан байна. Эндээс үзэхэд коронавирус түүний өмнө нь  мэдэрдэг байсан мэдрэмжүүдийг дахин сэргээсэн байх магадлалтай гэж судлаачид үзжээ.

Цар тахал, хөл хорионы улмаас иргэд сэтгэцийн өвчтэй болж болзошгүй. Олон нийтийн ажилгүйдэл, түгшүүр, нийгмээс тусгаарлагдсан байдал зэрэг нь зөвхөн Японд ч бус олон оронд хүндээр тусаж байгаа талаар мэргэжилтнүүд мэдээлсэн юм.