Дөрвөн жилийн өмнө Их Британийн Линкольншир хотод хоёр залуу бооцооны машинаас 2000 фунт дээрэмдэж байхдаа гэрэл зургаа авахуулсан байна. Хэрэг гарсны дараа цагдаагийн ажилтнууд тэднийг мөрдөхөд тийм ч их цаг зарцуулсангүй. Учир нь, тэдний “тэнэг” үйлдэл нь өөрсдийг нь барьж өгчээ. Түүний дараа өнөөх хоёр залуугийн нэг нь 2.5 жилийн хорих ялаар шийтгүүлсэн бол нөгөө нь хэргээ хүлээснээр зургаан сарын тэнсэн харгалзах ялаар шийтгүүлсэн юм. Гэвч тэд түүхэн дэх анхны “тэнэг” гэмт хэрэгтнүүд байгаагүй билээ. “Эргэлт.мн” мэдээллийн сайтаас түүхэн дэх хамгийн “тэнэг” гэмт хэрэгтнүүд хэрхэн ажиллаж, өөрсдийгөө хуулийнханд барьж өгснийг танилцуулж байна.

ДЭЭРЭМ ХИЙСНЭЭ ЦАХИМ ХАЯГААРАА ЗАРЛАЖЭЭ

Эндрю Хеннеллс гартаа хутга барьсан зургаа “Теско дэлгүүр дууссан” гэх тайлбартайгаар фэйсбүүк хуудастаа нийтэлж, сайрхсан байна. Үүнийг харсан цагдаагийн ажилтнууд 15 минутын дараа тэднийд ирж, “Теско” дэлгүүрээс дээрэмдсэн 410 фунт стерлингийг нь хураан авч, түүнийг баривчилжээ. Үүнийхээ дараа тэрбээр дөрвөн жилийн хорих ялаар шийтгүүлсэн юм.

ДЭЭРЭМДСЭН БАЙШИНДАА УНТАЖ БАЙГААД БАРИГДЖЭЭ

Тэтгэвэрт гарсан гэр бүлийг амралтад явахыг нь мэдсэнээр Лукаш Чожновский ахмадуудын гэрийг тонохоор төлөвлөсөн байна. Тэрбээр гэрт нь орж, зочны өрөөний тавилгуудыг эвдэж, авах зүйлээ олсны дараа хэсэг хажуулахаар унтлагын өрөөнд оржээ. Түүнийг унтаж байх үеэр цаг агаарын хүндрэлээс болж, амралтдаа явж чадаагүй хоёр хөгшин буцаж ирсэн байна. Тэд дээрэмчнийг сэрэхээс өмнө цагдаа дуудсан бөгөөд 28 настай Чожновский хэргээ хүлээж, хоёр жил хорих ял сонсохоос гадна 200 фунт стерлингийн торгууль төлсөн байдаг.

ТОЛГОЙГ НЬ АВЧРАХАД АМЛАСАН ШАГНАЛЫГ ӨӨРӨӨ АВАХЫГ ОРОЛДЖЭЭ

Афганистаны зүүн хэсэгт байрлах АНУ-ын цэргийн бааз руу дайрсан халдлагыг зохион байгуулсан Талибаны захирагч нарын нэг Мохаммад Ашан өөрийнх нь толгойд амласан 100 ам.долларын шагналыг авахын тулд цагдаа нарт баривчлуулжээ. Босогчдын бүлгийн захирагчийн ажлаа орхиж, мөнгөгүй болсон Ашан өөрийн биеэр цагдаагийн газарт очжээ. Цагдаагийн ажилтнууд түүнийг шууд баривчилсан юм. Гэтэл Ашан өөрийнхөө зурагтай эрэн сурвалжлах хуудас руу зааж, “Би өөрийгөө барьж өглөө. Одоо шагналынхаа мөнгийг авъя” хэмээжээ.

ӨРГӨСТ ХЭМХ АШИГЛАЖ, ДЭЛГҮҮР ДЭЭРЭМДЭХИЙГ ОРОЛДЖЭЭ

2014 онд Гари Роуд хэмээх залуу хүнсний ногоо, жимс жимсгэний дэлгүүр дээрэмдэхээр завджээ. Тэрбээр хар өнгийн оймсондоо өргөст хэмх хийж, түүнийгээ кассын ажилтан руу чиглүүлж, байгаа бүх мөнгөө гаргаж өгөхийг шаардсан байна. Түүний энэ тэнэг үйлдлийг харсан, тэтгэвэртээ гараад удаагүй байсан цагдаагийн офицер түүнийг баривчилжээ.

УХААЛАГ ГАР УТАС УХААН МУУТАЙ ГЭМТ ХЭРЭГТНИЙГ БАРЬЖ ӨГСӨН НЬ

Гэрэл зургаас болж баригдсан гэмт хэрэгтнүүд зөвхөн дээрх хоёр дээрэмчнээр тогтсонгүй. 25 настай Эшли Кийс хулгайлсан гар утсаараа өөрийнхөө зургийг дарж, цахим хуудастаа байршуулжээ. Гэтэл Эшлигийн зураг “Whatsapp” сувгаар гар утасны жинхэнэ эзний ажлын хамтрагчид руу автоматаар илгээгджээ. Үүний дараахан цагдаагийн офицерууд Эшлиг баривчилж, гэрээс нь 4000 фунт стерлингийн үнэтэй бугуйн цаг олсон байна. Хулгайн хэрэг хийснээ хүлээсэн Эшли найман сар хоригдсон юм.