• Өнөөдөр 2024-03-28

Тэрүнофүжи Г.ГАН-ЭРДЭНЭ: Бэртсэний дараа ч, өнөөдөр ч намайг дэмжиж байгаа хүмүүсийг би хэзээ ч мартахгүй

2021-04-02,   885

-Бусадтай шударга, үнэн байхын тулд шүүмжлэл, зүхэл бүгдийг нь хүлээж авна-

          Японы сүмо бөхийн хаврын башёд Тэрүнофүжи Г.Ган-Эрдэнэ зодоглож, дахин өөрийгөө батлан харуулж, Озэки цолонд хоёр дахь удаагаа хүрээд байна. Урт удаан хугацааны бэртэл гэмтлийн дараа эргэн ирсэн түүний барилдааныг олон мянган үзэгчид хүсэн хүлээж байжээ. Үүнтэй холбогдуулан “Ховор ярилцлага” буландаа түүний 2017 оны долдугаар сард Японы Тайшу сонинд өгч байсан нэгэн ярилцлагыг хөрвүүлэн хүргэж байна. Японы сүмо бөхийн хорхойтнууд бэртэж, гэмтсэн байхад нь Тэрүнофүжи Г.Ган-Эрдэнэ олон удаа “Монгол руугаа буц” хэмээн шүүмжилж байсан юм. Шүүмжлэл дундах Тэрүнофүжи Г.Ган-Эрдэнийн сэтгэл зүй, дотоод хүн чанарыг нь гаргаж ирсэн уг ярилцлага таныг уйдаахгүй болов уу.

-Хаврын башёд барилдаж өвдгөө гэмтээсний дараа Монгол руу очсон гэж сонссон. Энэ үнэн үү?

-Хаврын башё өндөрлөсний дараа өвдгөө үзүүлж, эмчлүүлж байгаад 14 хоног Монголд байж байгаад ирсэн. Тэнд байсны ачаар бие ч, сэтгэл зүй ч арай дээрдсэн. Сүүлийн үед хөнгөн дасгал хийж, хоолны дэглэм барьж байгаа. Хаврын башёгээс хойш 11 кг жин хаясан.

-Хаврын башёгийн 14 дэх өдөр Котошогикү Казухирог ялсан. Энэ ялалт их ч маргаан дагуулсан. Гэтэл та түүний дараах хоёр барилдаандаа дараалан унасан. Яагаад тэр үеэр бэртсэнээ хэлээгүй юм бэ?

-Энэ талаар ярьмааргүй байна. Одоогийн миний ярих бүхэн шалтаг юм шиг л сонсогдох болно. Сайн барилдаан үзүүлж чадаагүй нь миний л буруу болохоор үүнд тайлбар хийх шаардлагагүй. Харин өнгөрсөн цаг үеэс сурч мэдсэн зүйлсээ туршлага болгож ирээдүй рүү шаргуу тэмүүлэх тухайгаа л ярьж болох байна. Би 2015 оны зун Сэкизава цолоо хүртсэн ч түүний дараах жил хамгийн муу амжилтыг үзүүлж, доогуур эрэмбэлэгдсэн. Тэр үед хэчнээн хичээгээд ч энгийн хэвэндээ орж чадахгүй байсан юм. Түүнээс болоод шүүмжлэлд ч их өртсөн. Харин одоо бол ялагдахыг хүсэхгүй байна.

-Өнгөрсөн хаврын башёгийн сүүлийн өдөр үзэгчид таныг шүүмжилж, “Монгол руугаа буц” гэж байлаа. Түүнийг нь сонссон уу. Энэ талаар юу гэж бодсон бэ?

-Тэмцээн дууссаны дараа л хэвлэл мэдээллийн хэрэгслээс тийм зүйл болсныг нь мэдсэн. Юу гэж бодогдсон талаараа заавал ярих ёстой гэж үү. Би бусадтай ч гэсэн шударга байхын тулд шүүмжлэл, зүхэл бүгдийг нь хүлээж авсан.

-Бэртэл чинь ч бүрэн эдгээгүй үед тийм зүйл болсон доо. Зөвхөн бие махбодийн бус  сэтгэл зүйн хувьд ч гэсэн хэцүү байсан уу?

-Хаврын башёгийн 13 дахь өдөр Какүрюү М.Анандтай барилдахдаа хайнга хандаж, бэртлээ улам хүндрүүлсэн юм. Тэр үед барилдах нь л миний үүрэг байсан учир хийх ёстойгоо хийсэн. Хэнд ч хэлэхийг хүсээгүй. Харин одоо бол юу юунаас илүү эрүүл мэнддээ анхаарч байна даа.

-Юу таныг эрүүл мэнддээ юу юунаас илүү анхаарахад хүргэв ээ?

-Озэки болсноосоо хойш хоёр дахь барилдаандаа л өвдгөө гэмтээсэн. Тэр бэртэл надад хамгийн их асуудал, чирэгдэл дагуулж ирсэн. Тухайн үед бэртэл, гэмтлээс илүүтэй яаж барилдах, ямар мэх хийхээс минь хамаарч барилдаан шийдэгдэнэ гэж бодож байлаа. Тэр ч утгаараа өөрийгөө маш их зоригтой барилдаж чадсан гэж боддог. Харин зөвхөн барилдаан ч биш цол дагаж ирдэг хариуцлага гэж юм байдаг юм байна. Одоо бол хурдан эдгэрч, буцаад хуучин формондоо ороход бүрэн анхаарч байна.

-2013 оны есдүгээр сард дээд зиндаанд барилдах болохоороо яагаад дэвжээнийхээ нэрийг Тэрүнофүжи болгож өөрчилсөн юм бэ?

-Тэрүнофүжи гэдэг нь хуучин Ёкозүна байсан миний Тэрүкүни, Асахифүжи багш нарын нэрийг нэгтгэсэн нэршил.

-Бэртсэний дараа ч, өнөөдөр ч намайг үргэлжлүүлэн тусалж, дэмжиж байгаа хүмүүсийг би хэзээ ч мартахгүй. Би тэрхүү хүмүүсийн төлөө  ирээдүйд илүү их тэмцэх болно-

-Сүмо бөхөд Ичиножо, Эндо нар бүхий л хүмүүсийн анхаарлын төвд орж байгаад атаархаж байсан уу?

-Огт үгүй. Тэр маш гайхалтай залуус. Би анх тэр хоёртой барилдаж үзсэн цагаасаа хойш л хүчтэй өрсөлдөгч болохыг нь мэдэрсэн. Харин түүний дараа Такаясу Акира гарсан ирсэн. Тэр ч гэсэн гайхалтай нэгэн. Түүнтэй цаг үргэлж бэлтгэл хийж, нэгнийгээ хурцалж байсан минь л намайг Озэки цолонд хүргэсэн юм болов уу гэж боддог.

-Зөвхөн өөрийн бэлтгэлийн хүчээр энэ амжилтад хүрсэн гэсэн үг биш байх нь. Сүмо бөхийн дэвжээн дээрх өрсөлдөгчид бодит амьдрал дээр хэр сайн найзууд байж чаддаг юм бэ?

-Тэр тэмцээнд Озэки Аминишики Рюүжи бид хоёр дараалан долоо даваад байлаа. Гэтэл дараагийнхаа барилдаанд би Кисеносатод, Аминишики Кафүсэкид унаж, бид хоёр хоёулаа унасан юм. Харин маргааш нь бид хоёрыг шоолж, дургүйцлээ хийж байв. Тэмцээний 10 дахь өдөр Аминишики барилдааны үеэр өвдгөө бэртээж, шууд эмнэлэгт хүргэгдсэн. Сайн форм, бэлтгэлтэй байсан залуу бэртлийн улмаас дараа дараагийн барилдааны орхиж, эмнэлэгт хүргэгдсэн юм. Тэр үед л би түүний төлөө юу ч болсон хамаагүй ялах ёстой, өөрсдийнхөө нэрийг сэргээх хэрэгтэй гэж барилдсан. Тийм сэтгэл зүйтэй гарч барилдаж л би Ёкозүна Хакүхо М.Даваадоржийг анх удаа унагаж байлаа. Тэрхүү ялалт зөвхөн миний бус Аминишикигээс олж авсан урам зориг юм.

-Удахгүй болох зуны башёд найдвар тавьж байгаа юу. Сүмо бөхөд шимтэгчид танаас юу хүлээж, хүсэж байгаа гэж бодож байгаа вэ

-Бэртсэнээсээ хойш ганц ч удаа өөрийнхөө сайн талыг үзэгчдэд харуулж чадаагүй. Харин одоо бол би ялж, бүхнээс, хэн хүнээс илүү ялахыг хүсэж байна. Саяхнаас намайг дахин барилдахыг зөвшөөрсөн. Урьд өмнө нь хэзээ барилдаж үзээгүй юм шиг мэдрэмж авсан. Тэр маань надад сайхан санагдаж байна. Намайг анх Озэки болоход хүрээлэл, сүмо бөхийн үзэгчид, хэвлэлийнхэн бүгд л надад ам сайтай байсан. Харин бэртсэнээс хойш тэдний хандлага өөрчлөгдсөн.

Бэртсэний дараа ч, өнөөдөр ч намайг үргэлжлүүлэн тусалж, дэмжиж байгаа хүмүүсийг би хэзээ ч мартахгүй. Би тэрхүү хүмүүсийн төлөө  ирээдүйд илүү их тэмцэх болно. Тэд намайг хүлээж, цаашид миний хэр хол явахыг хараасай гэж хүсэж байна.


Тэрүнофүжи Г.ГАН-ЭРДЭНЭ: Бэртсэний дараа ч, өнөөдөр ч намайг дэмжиж байгаа хүмүүсийг би хэзээ ч мартахгүй
АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 0
Шинэ мэдээ
Нийтлэлчид
Монгол Улс, Улаанбаатар хот, Сүхбаатар дүүрэг, VIII хороо, "Ардын эрх"-ийн байр, Гуравдугаар давхарт Эргэлт.мн редакц
7509-1188