-Өөрөөсөө өөр шинэ зүйлийг хүсэж, шунаж байна-

          Кино урлаг, тэр дундаа инээдмийн, тулаант кинонд дуртай үзэгчдэд хамгийн их хайрлаж, хүндлэгдсэн жүжигчин бол Жеки Чан. Түүнийг 1970-аад оны сүүлч үеэр кино урлагийн ертөнцөд хөл тавьж байхад нь “Дараагийн Брюс Ли” хэмээдэг байж. Гэхдээ Жеки Чанд Брюс Лигээс ялгарах олон зүйл бий. Түүний тулааны урлагийг инээдмийн төрөлтэй хослуулж чадсан нь Брюс Лигээс ч илүү Холливүүдийн од болж, дэлхий дахинд хүндлэгдэхэд нөлөөлсөн гэдэг. Энэ удаагийн “Ховор ярилцлага” буландаа АНУ-ын “Кросвалк” сэтгүүлийн сэтгүүлч, кино судлаач, шүүмжлэгч Холли МакКлюр 2002 оны аравдугаар сард Жеки Чанаас авсан ярилцлагыг хөрвүүлэн хүргэж байна. Тухайн үед Жеки Чаны тоглосон “Оргил цаг 2” кино нээлтээ хийж байсан бөгөөд хэвлэлд тэр бүр ярилцлага өгөөд байдаггүй Жекитэй судлаач МакКлюр киноных нь нээлтийн үеэр цөөн хором ярилцсан аж.

-Жеки, та яагаад өөрийн бүтээж ирсэн киноныхоо урсгал, чиглэлийг өөрчлөхөөр шийдсэн юм бэ. “Оргил цаг 2” кинон дээр таны хэв маяг арай өөр харагдаж байлаа?

-Хэдэн жилийн өмнө би менежертээ “Одоо хийж байгаагаасаа илүү тэс өөр зүйлийг хийхийг хүсэж байна” гэдгээ хэлсэн юм. Тэр үед би “Оргил цаг, “Шанхай”, “Хонконг” зэрэг кинонуудаасаа бүр залхаж гүйцээд байлаа. Өөрөөсөө өөр зүйлийг хүсэж, шинэ зүйлсэд шунасан юм л даа. Менежертэйгээ уулзсаныхаа дараа АНУ-ын Нью-Йорк руу очиж, найруулагч Анг Литэй уулзсан. Түүнтэй уулзах бүрт надад найдваргүй санагдаж байсан зүйлс гэрэлтэй санагдаж, лаа асааж өгдөг байв. Тэгээд л энгийн нэгэн инээдэм, тулааны урлагийг хослуулсан киноноосоо татгалзахаар шийдсэн. Түүнээс өмнө би маш олон кинонд тоглосон. Кинонд тоглохгүй л бол болохгүй юм шиг санагдаад бүхий л зүйл дээр яардаг байлаа. Цаг үргэлж яардаг. Тэгээд л “Оргил цаг 1”, хоёр, гурав, дөрөв, тав, зургаа, долоо. Харин одоо бол би энэ бүхнийг хийхээс ядарч байна.

-Тэгэхээр “Оргил цаг” кинонд дараагийн анги байхгүй гэсэн үг үү?

-Үгүй. “Оргил цаг 3” хийнэ. Кино багийнхан маань тухайн киноны зураг авалтыг хийж 2004 он гэхэд олон нийтэд хүргэх бодолтой байгаа. “Оргил цаг 3”-ын дараагийн дахин нэг кино төсөл хүлээгдэж буй. Тэр кино төсөл маань миний Америкт хийсэн хамгийн шилдэг кино байх болов уу.

-Яагаад, юугаараа хамгийн шилдэг нь болох юм бэ?

-Яг ч сайн хэлж мэдэхгүй байна. Гэхдээ гарах үеэр нь чи заавал очиж үзээрэй. Аль эсвэл хамгийн шилдэг гэсэн нь миний буруу ч байж магадгүй юм. Миний сайн гэж бодсон зүйл олон нийтэд муу санагддаг. Харин миний муу гэж бодсон зүйл үзэгчдэд  сайн санагддаг юм билээ. Тэгэхээр миний бодол үргэлж хүмүүсээс зөрдөг гэсэн үг (инээв). Гэхдээ магадгүй энэ тал маань ч намайг жүжигчин болоход хамгийн их нөлөөлсөн байх.

Би хүмүүсийн инээмсэглэлгүй царайнд юу нуугдаж байгааг мэдэрч чаддаг болохоороо л инээлгэж чаддаг гэж боддог.

-Хэрэв танаас өөр ази хүн “Оргил цаг” кинонд дүр бүтээсэн бол яах байсан бол гэж бодож байсан уу?

-Хэрэв миний тоглосон “Оргил цаг” кино Хонконгт цацагдлаа гэхэд 50 сая ам.долларын ашиг олж болно. Харин “Оргил цаг”-т өөр хүн тогловол хагас сая ам.долларын ашиг олж чадах байх.

-Тэгвэл таны “Оргил цаг 3” кинонд дүр бүтээх, уг киног хийх гол бодол чинь юу юм бэ?

-Америкийн зах зээл. Яг одоо би зөвхөн америкчуудад зориулж кино хийх ёстойгоо мэдэрч байна. Гэхдээ жил бүр Азийн зах зээлд зориулж, уран бүтээлээ хийнэ л дээ. Тийм ч учраас “Оргил цаг 2” киноныхоо зураг авалтыг дуусгаад Хятадын түүхийг харуулсан кинонд тоглож байгаа.

-Хятад хэл дээр өөрийн гэсэн дууны цомогтой. Ихэвчлэн орон нутагт, хөдөө нутгийн тухай дуу дуулах дуртай-

-“Оргил цаг 2” кинон дээр Жеймс Брауны дууг дуулж, дүрийг нь ч хэсэгхэн хором бүтээсэн байна. Яагаад кинон дотроо дүрийн шилжилт хийхээр болов оо?

-Маш амархан. Надад дуулах тийм ч хэцүү санагддаггүй (инээв). Би Хятад хэл дээр өөрийн гэсэн дууны цомогтой. Би ихэвчлэн орон нутагт, хөдөө нутгийн тухай дуу дуулдаг. Америк дуунуудыг ч мөн сонсоно. Үргэлж л толгой дотор ямар нэгэн зүйл бодогдуулж байдаг. Харин би Жеймс Брауны үнэнч шүтэн бишрэгч. Би түүний дуунуудыг сонсох дуртай. Тийм ч учраас киноны нэг хэсэг дээр түүний дууг дуулахаасаа татгалзаагүй байх.

-Жеймс Браунд өөрт нь хандаж шүтэн бишрэгч нь гэдгээ хэлж байв уу?

-Тэгэлгүй яах вэ, хэлж байсан. Би зөвхөн түүний дуулахад бус бүжиглэхэд нь ч дуртай. Намайг бага байхад сургуулийн багш нар зөвхөн бичигдсэн дүрэм, хөдөлгөөнийг даган дуурайж, бүжиглэхийг заадаг байсан. Одоо бодох нь ээ тэр нь маш хэцүү байжээ. Хүүхэд өөрийн хүссэнээрээ чөлөөтэй бүжиглэж ч чадахгүй шүү дээ. Харин Жеймс Браун маш гайхалтай дуучны зэрэгцээ чадварлаг чөлөөт бүжигчин.

-Таныг багаасаа Жеймс Бондод дуртай байсан гэх юм билээ. Анх өөрийгөө Жеймс Бондын дүрээс олж байсан юм уу?

-Тийм ээ. Би үргэлж л өөртөө дутагдсан ямар нэг зүйлээ Жеймс Бондын дүрээс олж авдаг. Бага байхдаа цаг үргэлж Жеймс Бондын дүрд тоглохыг хүсдэг байж билээ. Түүнтэй адилхан болохыг хүсэж, дэлхийг аврахыг мөрөөддөг байлаа. Магадгүй тийм ч учраас би “Смөүк” кинон дээрээ Жеймс Бонд шиг хар хослол өмсөж, тоглосон юм болов уу. Тэгсэн минь ч үнэхээр хөгжилтэй байсан.

-Жеймс Бондын дүрд тоглосон жүжигчдээс хэнд хамгийн их дуртай вэ. Хэн нь илүү их жинхэнэ Жеймс Бондод дөхөж очсон гэж боддог вэ?

-Алийг нь ч жинхэнэ Жеймс Бонд гэж бодохгүй байна. Өнөө цагт маш сайн сайхан үйлс хийж, бусдыг хамгаалж байгаа олон хүн бий. Би тэд нарыг л жинхэнэ Жеймс Бонд гэж боддог.

Биднийг ийн ярилцаж суутал Жекигээс хэвлэлийн болон үзэгчид нь ирж, тодруулга, гарын үсэг авахаар супер одыг тойрч зогслоо. Ингээд л бидний ярилцлага дуусах болсон юм. Харин Жеки өөрөөс нь асуулт асуусан, гарын үсэг хүссэн хүн бүрт татгалзахгүй байлаа. Шаргуу хөдөлмөр, амьдралын үнэнээрээ өдийг хүртэл явж, дэлхий дээрх олон сая хүний хүндлэлийг хүлээсэн Жеки Чан бол миний мэдэх үзэгчиддээ хамгийн их хайртай кино жүжигчин юм.