“Амаржаад удаагүй эх болон нялх үрд хүнлэг бус хандсан” хэмээн Засгийн газрын ордны өмнө зохион байгуулсан эсэргүүцлийн жагсаалыг гаднын хэвлэлүүд онцолж байна. Хэвлэлүүдэд “Амаржсан эхэд хүнлэг бус хандсан ажилтныхаа өмнөөс бурууг нь хүлээж, Ерөнхий сайдын албан тушаалаа өгч байна” хэмээжээ. Сингапурын “Straits Times” сонин бидний тухай:

       “Монгол Улсын Ерөнхий сайд У.Хүрэлсүх нэг өдрийн дотор өөрийн Засгийн газраа татан буулгаж, огцорчээ. Тус улсын нэгэн төрөх эмнэлгээс амаржсан эхийг хүүхдийнх хамт яаралтай нүүлгэн шилжүүлж буй бичлэг цахим сүлжээгээр тархсанаар уг үйл явдал эхэлжээ.  Албаны хүмүүс амаржсан эхийг зөөвөрлөхдөө нимгэн халаад, углааштай нь гадаа гаргасан байна. Монгол Улсад өвлийн улиралд их хүйтэрч, хасах 40 хэмд хүрдэг аж.

     Амаржсан эхийг өвлийн хүйтэнд нимгэн хувцастай гаргаж, хүнлэг бус хандсан нь маш олон монголчуудыг төв талбай дээрээ цуглаж, эсэргүүцэл илэрхийлэхэд хүргэжээ. Тэд эмч нарын хариуцлагагүй байдлыг шүүмжлэхийн зэрэгцээ шаардлагагүй байхад удаан хугацаагаар хөл хорио тогтоож, гаднын орон руу зорчихыг хориглосонд дургүйлхэж буйгаа илэрхийлсэн байна. Жагсагчид хасах 40 хэмийн хүйтэнд бүх хувцсаа тайлж, эсэргүүцэл үзүүлсний эцэст тус улсын Ерөнхий сайд У.Хүрэлсүх мэдэгдэл хийжээ.

     Тэрбээр доод албан тушаалтан нь хариуцлагагүй хандсаны бурууг өөртөө хүлээж, өөрийгөө болон өөрийн Засгийн газраа татан буулгаж, огцрох хүсэлт гаргасан байна. Мөн У.Хүрэлсүх өрсөлдөгч намаас нэр дэвшиж, Ерөнхийлөгч болсон “Х.Баттулга уг эсэргүүцлийн жагсаалыг зохион байгуулсан” гэж буруутгасан аж. Харин үүний хариуд Ерөнхийлөгч Х.Баттулга “Ерөнхий сайд яагаад ард түмний итгэлийг бууруулж, үндэсний эв нэгдлийг алдагдуулж, Монгол Улсын Ерөнхийлөгчийг илт гүтгэн доромжилсон үйлдэл хийх болсныг би гайхаж байна” хэмээсэн юм.

     Орос, Хятадын дунд байрлах 3.3 сая хүн амтай уг улс одоог хүртэл коронавирусийн халдвараас маш сайн сэргийлжээ. Өнгөрсөн оны гуравдугаар сараас хойш ердөө 1600 хүрэхгүй хүн коронавирусийн халдвар авч, одоогоор 526 идэвхтэй тохиолдол бүртгэгдсэн байна.