ОХУ-ын сөрөг хүчний удирдагч Алексей Навальный өнгөрсөн оны наймдугаар сард Герман Улс руу зорчихдоо онгоцонд уусан цайнаасаа хордсон. Тэрбээр уг хэрэгт тус улсын Ерөнхийлөгч Владимир Путиныг сэжиглэж буйгаа цахим сүлжээгээр дамжуулан илэрхийлсэн билээ. Тэгвэл өнгөрсөн нэгдүгээр сарын 19-нд Навальный эх орондоо эргэж ирэхэд түүнийг цагдаагийн байгууллагынхан нисэх онгоцны буудлаас баривчлан, ОХУ-ын нийслэл Москва хотод хорьж байсан юм.

    Үүнтэй холбоотойгоор сөрөг хүчний удирдагч Алексей Навальныйг дэмжигчид түүнийг суллахыг шаардаж, Орос орон даяар эсэргүүцлийн жагсаал өрнүүлж, цэрэг, цагдаагийн байгууллагынхантай хоёр ч удаа томоохон хэмжээний мөргөлдөөн үүсгэсэн. Тус жагсаалын хүрээнд нийт 5000 гаруй иргэнийг баривчилсан мэдээлэл бий.

        Цаг үеийн нөхцөл байдал хүнд байх энэ үед Москвагийн шүүх Алексей Навальныйд холбогдох хэргийн шийтгэлийг дахин өөрчилж, түүнд оноосон 3.5 жилийн тэнсэн харгалзах ялыг хорих ял болгожээ. Тэрбээр 2014 онд төрсөн ах Олегтой хамтран 442 мянган ам.доллартой тэнцэх хэмжээний улсын мөнгө шамшигдуулсан хэрэгт холбогдсон. Тус хэрэгтэй холбоотойгоор 2019 онд Алексей Навальныйд 3.5 жилийн тэнсэн харгалзах ял оноосон бөгөөд тус ялыг өнөөдөр Москвагийн шүүхээс хорих ял болгон өөрчлөв. Навальныйн хорих ялаас гэрийн хорионд байсан өнгөрсөн 10 сарын хугацааг хасаж, 2.8 жилийн хорих ял болгосон байна.

     ОХУ-ын сөрөг хүчний удирдагч Алексей Навальный тус шийдвэрийн талаар “Та нар сая сая хүнийг хөдөлгөж болох ганцхан хүнийг баривчилж, буруу зүйл хийж байна” хэмээн шүүхийн тэнхимээс мэдээлсэн юм.