-Дэлхийн хүний эрхийн төлөөх байгууллагаас ОХУ-ын эрх баригчдад арга хэмжээ авч болзошгүй-

       ОХУ-ын сөрөг хүчний удирдагч Алексей Навальныйг баривчилсантай холбогдуулан тус улсын 100 орчим хотод эсэргүүцлийн жагсаал өрнөжээ. Жагсаалын үеэр жагсагчид “Путин бол хулгайч”, “Навальныйг чөлөөл” гэх зэргээр эсэргүүцлээ илэрхийлж байлаа. Оросын маш олон хотод үргэлжилсэн уг жагсаалын талаар нэр нөлөө бүхий, олны танил эрхмүүд өөрсдийн санал сэтгэгдлээ хуваалцсаныг та бүхэнд хөрвүүлэн хүргэе.

Хүний эрхийн төлөөх байгууллагын Европ, Төв Азийг хариуцсан захирал Хью Уильямсон “ОХУ-ын эрх баригчид сөрөг хүчнийг бүхий л талаараа хориглож, хоригийг татгалзсан хүмүүст хариуцлага ногдуулж байна. Хүмүүс шударга бус үйл явдлын эсрэг өөрийн дуу хоолойгоо эрх чөлөөтэй илэрхийлж, жагсаал, цуглаан хийх эрхтэй. Үүнийг эрх баригчид эерэгээр хүлээн аваасай гэж хүсэж байна. Хэрэв эрх баригчид иргэдийн жагсаалыг хориглож, иргэдтэй мөргөлдсөөр байх тохиолдолд эрх баригчдын эсрэг арга хэмжээ авах талаар Дэлхийн хүний эрхийн төлөөх байгууллага хуралдах болно” хэмээжээ.

Харин ОХУ-ын холимог тулааны спортын нэрт тамирчдын нэг Александр Волков “Бидний харж чадах хамгийн муу, муухай ирээдүй дөнгөж л эхэлж байна” хэмээн цахим хаягаараа дамжуулан нийтэд үзэл бодлоо хүргэсэн байна.

ОХУ-ын Хабаровск хотод өрнөсөн эсэргүүцлийн жагсаалд оролцож байсан 57 настай багш Виталий Блажевич “Би хэзээ ч Навальныйг дэмжиж байгаагүй, дэмжих ч үгүй. Гэхдээ түүнийг хорьж, бүрэн эрхийг нь хааж болохгүй. Эрх баригчид маш муу нүүдэл хийж, байдлыг ноцтой түвшинд хүргэж байна. Би энэ бүх жагсаал, цуглаан, эсэргүүцэл, хүчирхийлэл ямар нэгэн зүйлийг эерэг талаас нь өөрчлөөсэй гэж хүсэж байна” гэжээ.

Оросын 100 гаруй хотод өрнөсөн эсэргүүцлийн жагсаалын талаар Навальныйгийн туслах, улстөрч Леонид Волков “Хэрэв Путин энэ аймшигтай эсэргүүцлийн жагсаалын ард өөрийгөө нуух гэж байгаа бол тэр өөрийгөө гэнэн, жаахан охин шиг эндүүрч” хэмээх хатуу үгсийг цахим сүлжээгээр дамжуулан дайсан байна.