АНУ-ын Ерөнхийлөгчийн сонгуулийн дүнг баталгаажуулах Конгрессын хуралдааны үеэр эсэргүүцлийн жагсаал хяналтаас гарч, Цагаан ордны өмнө бослого дэгдсэн байна. Тус улсын төрийн тэргүүний суудлаас бууж буй Дональд Трампыг дэмжигчид хууль тогтоох байгууллагууд руу халдаж, үймээн үүсгэсний улмаас нэг хүн газар дээрээ амиа алджээ. Нийслэлд үүссэн эмх замбараагүй байдалд хэв журам сахиулахаар үндэсний цэргийн хүчийг ашиглаж, ойролцоо мужуудад өглөөний зургаан цаг хүртэл хатуу хөл хорио тогтоогоод байна.

       Эсэргүүцэл хяналтаас гарсны дараа Ерөнхийлөгч Дональд Трамп “Бидний саналыг хулгайлж, залилсныг бүгд мэдэж байгаа. Гэхдээ та бүхэн одоо гэр гэр рүүгээ буцах хэрэгтэй. Бид хуулийг дээдэлж, энх тайвныг тогтоох ёстой” хэмээн цахим хаягаараа дамжуулан дэмжигчдэдээ хүргэжээ. Фэйсбүүк, Твиттер компаниас Трампын дүрс бичлэгийг устгаж, 12 цаг хүртэлх хугацаагаар цахим хаягийг нь хориглох арга хэмжээ авсан байна.

       Сонгуулийн үр дүнг үл хүлээн зөвшөөрөх, үймээн үүсэхэд турхирсан гэж Трамп бусад орны төрийн тэргүүдээс шүүмжлэл хүртээд байна. Харин АНУ-ын Ерөнхийлөгчийн сонгуульд Ардчилсан намаас нэр дэвшиж, ялалт байгуулсан Жо Байден түүнээс өргөсөн тангарагтаа үнэнч байж, үндсэн хуулиа хамгаалахыг шаардсан юм. Нийслэлд дэгдсэн үймээн намжсаны дараа тус улсын Конгресс үргэлжлүүлэн хуралдаж, Жо Байдены ялалтыг батлах асуудлыг эцэслэн шийдэх гэнэ.