Төр, нийгмийн зүтгэлтэн С.Зориг агсны амийг бүрэлгэсэн хэрэгт Т.Чимгээ, Б.Содномдаржаа нарыг гурван шатны шүүхээс буруутайд тооцож, 20 жилийн хорих ял оноосон. Мөн тэднийг эрүүдэн шүүж, ял хүлээлгэсэн гэх хэрэгт ТЕГ-ын дарга асан Б.Хурц, прокурор Г.Эрдэнэбат нарын есөн хүнийг буруутайд тооцож, гурван шатны шүүхээс ял оноогоод байгаа билээ.  Шинэ нөхцөл байдал үүссэний улмаас 20 жилийн хорих ял авсан Т.Чимгээ, Б.Содномдаржаа нарын хэргийг хуулийн дагуу задалж, дахин хянуулах дүгнэлтийг УЕП-оос Дээд шүүхэд хүргүүлсэн. Тэгвэл прокурорын уг дүгнэлтийг хэлэлцэх шүүх хурал яг одоо болж байна.

Шүүх хурлын эхэнд Б.Содномдаржаагийн өмгөөлөгч Д.Оюунчимэг, Т.Чимгээгийн өмгөөлөгч н.Оюунцэцэг нар  Б.Цогт шүүгчээс татгалзаж байгаагаа илэрхийлэв. Тодруулбал, Б.Цогт шүүгчийн эгч ТЕГ-т ажилладаг, мөн Т.Чимгээ, Б.Содномдаржаа нарыг эрүүдэн шүүсэн гэх хэрэгт буруутгагдсан ТЕГ-ын дарга асан Б.Хурцтай найзын холбоотой гэж үзсэний улмаас татгалзаж байгаа аж.

ӨМГӨӨЛӨГЧ С.ОЮУНЦЭЦЭГ: Б.Цогт шүүгчийн эгч ТЕГ-т ажилладаг. Б.Хурцтай найз нөхдийн холбоотой учир энэ хэрэгт шууд бусаар хувийн сонирхолтой

Энэ талаар Т.Чимгээгийн өмгөөлөгч С.Оюунцэцэг “Б.Цогт шүүгчийн эгч Тагнуулын Ерөнхий газарт ажилладаг. Мөн ТЕГ-ын дарга асан Б.Хурцтай найз нөхдийн холбоотой нь хэвлэл мэдээллийн хэрэгслээр удаа дараа гарч байсан. Эрүүгийн хэрэг хянан шийдвэрлэх тухай хуулийн 11.1.4-т зааснаар энэ хэрэгт шууд болон шууд бусаар хувийн сонирхол тээж байгаа, мөн тус хуулийн 12 дахь заалтын дагуу энэ хэргийн өмнөх шүүх хуралд оролцож байсан шүүгч дараагийн шатны шүүхэд дахин оролцож болохгүй гэсэн үндэслэлээр Б.Цогт шүүгчээс татгалзаж байна” гэв.

Харин Б.Содномдаржаагийн өмгөөлөгч Д.Оюунчимэг “Энэ хэргийн захиалагч, зохион байгуулагч нь тогтоогдоогүй байхад Т.Чимгээ, Б.Содномдаржаа нарыг гүйцэтгэх ажиллагаа, шунахай сэдлээр ялласан нь огт үндэслэлгүй, эргэлзээтэй. Тухайн үед эрүүдэн шүүсэн гэх асуудал илрээгүй байсан ч энэ хэргээр ял оноосон үйл явц нь тодорхой байсан. Гэрчүүдийн мэдүүлэг хүртэл тодорхойгүй. Т.Чимгээ, Б.Содномдаржаа нарыг гадуур явж байхад нь гэнэт С.Зоригийг алсан гээд, яллачихсан. Тийм учраас Б.Цогт шүүгчээс татгалзаж байна. Үүнийг шүүх бүрэлдэхүүн хэлэлцэж шийдвэрлэнэ биз” гэлээ.

Б.ЦОГТ: Миний эгч ТЕГ-т ажилладаг нь үнэн. Тэглээ гээд тэр байгууллагад үйлчлэх ёстой гэсэн үг биш"

Тэгвэл Т.Чимгээ, Б.Содномдаржаа нарыг ялласан Б.Цогт шүүгч “Миний эгч ТЕГ-т ажилладаг нь үнэн. Тэглээ гээд тэр байгууллагад үйлчлэх ёстой гэсэн үг биш. Би Б.Хурц гэдэг хүнтэй хамааралгүй. Өмнө нь ч хэлсэн, одоо ч хэлье. Би өргөсөн тангараг, хуулиндаа л үнэнч явна. Энэ хэргийг хэлэлцэхэд өмнө нь шүүгчээр орсон нь үнэн. Одоо шүүх хуралдаанд оролцож байгаа гурван шүүгч ч мөн оролцсон. Зөвхөн шүүхийн даргалагч л солигдсон байна. Бид хамтаараа л энэ хэргийг шийдсэн. Улсын дээд шүүхээс намайг энэ хэргийн шүүх хуралд хуваарилсан. Түүнээс биш би өөрөө хүсээд энэ хэргийг аваад байгаа юм байхгүй. Төрийн албан хаагчийн улс төрчдийн башир арга шиг гутаан доромжлохоо болих хэрэгтэй. Бид мэргэжлийн хуульч, өмгөөлөгч хүн. Надад С.Зоригийн хэргийг үнэн зөвөөр шийдвэрлэх гэсэн хүсэл эрмэлзэл байгаа болохоос ямар нэгэн байдлаар буруугаар эргүүлэх хүсэл алга” гэв.

Шүүх бүрэлдэхүүн хэлэлцэж, Б.Цогт шүүгчээс татгалзсан өмгөөлөгчдийн хүсэлтийг хүлээж авсангүй.  

Дээд шүүхээс Т.Чимгээ, Б.Содномдаржаа нарт холбогдох хэргийг дахин шалгах ёстой гэж үзвэл 20 жилийн хорих ял оноосон гурван шатны шүүхийн шийдвэр хүчингүй болох юм.