Малайз Улсын өдөр тутмын мэдээллийн сайтын мэдээлснээр тус улсад 15 жилийн өмнө буюу 2006 оны аравдугаар сарын 18-нд санаатайгаар үйлдсэн онц, хэрцгий хүн амины хэргийн хохирогч болсон Ш.Алтантуяад холбогдох хэрэг сөхөгдөж, тус улсын дээд шүүхээр дахин оржээ.

Дээрх хэрэгт холбогдсон гэмт этгээдүүд болох тус улсын Ерөнхий сайдыг хамгаалах албаны ажилтнууд байсан Азила Хадри болон Сирул Азхар Умар нар 2009 онд эл хэрэгт буруутгагдаж, 2013 оны давж заалдах шүүх хурлаар оноосон ялыг хүчингүй болгосон. Харин 2015 онд талийгаачийн ар гэрийнхэн дахин шүүх хурал зарласнаар гэмт этгээдүүдэд цаазаар авах ял оноосон байна.

Цаазаар авах ял оноосны дараа хүн амины хэрэгт холбогдсон Сирул Азхар Умар нь Австрали руу хил дамнан, зугтсан байдаг. Түүнээс хойш тус гэмт хэрэгт оролцсон Азила Хадри нь “Ерөнхий сайд Нажиб Разик энэ хэргийн захиалагч нь” гэж мэдүүлээд байв. Харин цаазаар авах ял сонссоныхоо дараагаар зугтсан Сирул эргэж ирэн, талийгаач Ш.Алтантуяагийн өмсөж байсан хүрмийг Малайзын Кота Дамансара дахь гэртээ хадгалж байснаа гаргаж өгчээ. Хүрмэнд “Бугуйн цаг, алтан бөгж, ээмэг” байсан талаар албаныхан мэдээллээ.

Талийгаач Ш.Алтантуяагийн амиа алдсан хэрэгт түүний ар гэрийнхэн Малайз Улсын Засгийн газрыг хуйвалдсан гэж үзэж буй бөгөөд 100 сая юанийн нөхөн төлбөр, харуул, хамгаалалтын нэхэмжлэл гаргасан байна.

Талийгаач Ш.Алтантуяа Куала Лумпур хотын ойролцоох Панкак Алам гэх газарт 2006 оны аравдугаар сарын 18-ны өдөр Малайз Улсын Ерөнхий сайдыг хамгаалах албаны ажилтан байсан Азила Хадри, Сирул Азхар Умар нарт амиа алдсан.

Ш.Алтантуяагийн ар гэрийнхэн түүнийг сураггүй болсон талаар Тайланд Улсын нийслэл Бангкок хотод байрлах Монгол Улсын Элчин сайдын яаманд мэдээлснээр талийгаачийн цогцсыг 2006 оны арваннэгдүгээр сарын 11-нд олсон байна. Албаныхны мэдээлж буйгаар “Талийгаачид цогцос гэхээр юм үлдээгүй, хэдэн хэсэг тарж, бутарсан яс байсан” бөгөөд шүүх шинжилгээгээр оруулж, Ш.Алтантуяа байсныг нь тогтоосон байна. Гэмт этгээдүүдийн мэдээлснээр тэд хийсэн хэргийнхээ ул мөрийг баллах гэж цогцсыг тэсрэх бодисоор тэсэлсэн аж. Мөн тэд цогцсыг тэслэхээсээ өмнө бие тус газар нь хоёр удаа буудан хөнөөсөн талаараа мэдээлсэн юм.