Хөвсгөл аймгийн “Эрдмийн далай” цогцолбор сургуулийн ахлах ангийн суралцагчид нэгнээ зодож, бэртэл учруулсан гэх хэрэг гараад буй. Бид энэ талаар тус сургуулийн нийгмийн ажилтан Д.Ундармаагаас тодрууллаа.

         Тэрбээр “Манай сургуулийн арванхоёрдугаар ангийн хүүхдүүд хоорондоо зодолдсон нь үнэн. Тавдугаар сарын 18-ны өдрийн 19:30 цагийн үед энэ үйл явдал болсон. Сургуулийн ойролцоох цэцэрлэгийн хашаанд зодолдсон. Чухам юунаас болж, ямар үйл явдал болсон талаар дэлгэрэнгүй мэдээлэл өгөх боломжгүй. Хэрэг мөрдөн байцаах шатандаа явж байгаа. Аймгийн цагдаагийн газар, боловсрол, хүүхэд хамгааллын байгууллагууд хамтарч ажиллаж байна. Сургуулийн зүгээс хяналтын камерын бичлэг, шаардлагатай зүйлээр хамтарч ажиллаж байна. Хохирогч хүүхэд ГССҮТ-д яаралтай хагалгаанд орж, биеийн байдал нь тогтвортой болсон гэх мэдээлэл өнөөдөр ирсэн.  Өнөөдөр эмчдээ үзүүлээд эмнэлгээс гарах байх. Маргалдсан хоёр хүүхэд нэг ангийн хүүхдүүд.  Хэрэгт холбогдсон хүүхэд хохирогч хүүхдийн араас цагдаагаас зөвшөөрөл авч очсон. Өнөөдрөөс хичээлдээ ирсэн. Хүүхдүүд маань анги, сургуульдаа нэр хүндтэй, хичээлдээ сайн хүүхдүүд” гэлээ.

         Харин албан бус эх сурвалж “Хохирогч хүүхдийг хичээл дээрээ сууж байхад нь гурван сурагч дуудаж гарган бүлэглэн зодсон. Тус үйл явдлын дараа хохирогч сурагч хичээлдээ сууж байгаад бие нь өвдөж сургуулиасаа гараад явахад үед дахин бүлэглэн зодож тархийг нь цөмөлж, ухаан алдуулаад орхиж явсан. Одоо ГССҮТ-д тархины хүнд хагалгаанд орсон бие нь маш хүнд үхэх, сэхэхийн зааг дээр байна" гэлээ.