Нийслэлийн Засаг даргын орлогч Т.Даваадалайг Туулын хурдны замын тендертэй холбоотойгоор Эрүүгийн цагдаагийн газраас баривчилсан. Шалгалтын явцад ямар нөхцөл байдал тогтоогдсон талаар ЦЕГ-ын Хэвлэл мэдээллийн албаны дарга Д.Мөнхуяг мэдээлэл өглөө. Тэрбээр  “Цагдаагийн байгууллагаас Туулын хурдны замын "Нэгдүгээр тойрог зам", "Хоёрдугаар тойрог зам" зэрэг төслүүдийг сонгон шалгаруулах явцад Т.Даваадалайг их хэмжээний мөнгө угаасан байж болзошгүй гэх мэдээллийг үндэслэн түүнд шалгах ажиллагаа явуулсан. Шалгалтын явцад Т.Даваадалай Туулын хурдны замын төслүүдийг сонгон шалгаруулахдаа гэр бүлийн хамаарал бүхий этгээд А-гийн үүсгэн байгуулсан болон түүний үеэл дүүгийн үүсгэн байгуулсан аж ахуйн нэгжид 5.6 тэрбум төгрөг, гэр бүлийн хамаарал бүхий хүн болох А-гийн найзын үүсгэн байгуулсан хоёр аж ахуйн нэгжид 709 сая төгрөг, мөн А-гийн 50 хувь эзэмшдэг аж ахуйн нэгжээр 47.9 сая буюу нийт 6.6 тэрбум төгрөгийг дээрх аж ахуйн нэгжүүдийн дансанд шилжүүлэн авч, ажил гүйцэтгэсэн мэтээр тайлагнаж, мөнгө угаасан байж болзошгүй нөхцөл байдал илэрсэн. Цагдаагийн байгууллагаас Авлигын тухай хуульд заасны дагуу албан тушаалтан Д-г Эрүүгийн хуулийн 22.1 дэх зүйл ангиар эрүүгийн хэрэг үүсгэн АТГ-т шалгуулахаар шилжүүлсэн байгаа” гэв.