Эрүүл мэндийн яамны Төрийн нарийн бичгийн дарга Д.Очирбат Улсын Нэгдүгээр эмнэлэгийн Удирдах зөвлөлийн даргаар давхар ажиллаж, эрх мэдэл албан тушаалын байдлаа урвуулан ашиглаж, ашиг сонирхлын зөрчил үүсгэдэг гэх. Тодруулбал, Д.Очирбат нь эмнэлгийн худалдан авах ажиллагааны төлөвлөгөө, төсөв батлах, худалдан авах ажиллагаанд хяналт тавих ажлыг давхар эрхэлж, эмнэлгийн санхүүжилтийг саатуулах зэрэг ашиг сонирхлыг зөрчил үүсгэдэг байна. 

       Мөн тэрбээр 2025 оны аравдугаар сарын 16-нд эмнэлэгийн удирдах зөвлөлийн хурал хийлгүй Б.Найданг ажлаас нь чөлөөлж, оронд нь Б.Нинжбадгарыг томилсон байдаг. Ингэхдээ албан тушаалын зэрэглэл болон албан тушаалын жагсаалтыг зөрчин Б.Нинжбадгарыг цалинжуулах тушаал гаргаж, эмнэлэгийн удирдлагуудыг мөрдөхийг шаардаж, 2025 оны арваннэгдүгээр сараас хойш цалинг үндэслэлгүйгээр олгож эхэлсэн байдаг. Ингэхдээ Б.Найдангийн цалинг нөхөн олгоогүй нөхцөл байдал үүссэн байна. Үүнээс гадна эмнэлэгийн төлөөлөн удирдах зөвлөлийн үйл ажиллагаа нь холбогдох хууль тогтоомжийн дагуу явагдах ёстой байтал эрх мэдлийн давуу байдлаас шалтгаалан гишүүдийн оролцоог хангадаггүй, хуралд хэлэлцэх асуудлуудын цаг хугацааг тулган өөрчилдөг, хурлын ямар нэгэн дэг баримтлалгүйгээр бусдыг загнах, хувийн сонирхолоо илэрхийлэх, хурал нь зохих төлөвлөлт, дэг журмын дагуу явагддагүй зэрэг албан тушаалын эрх мэдлээ урвуулан ашиглаж, өөртөө давуу байдал олгодог асуудлыг удаа дараа гаргадаг байна. Хамгийн гол нь, Эрүүл мэндийн яамны Төрийн нарийн бичгийн даргаар ажилладаг мөртлөө Улсын Нэгдүгээр төв эмнэлгийн Удирдах зөвлөлийн даргаар давхар ажиллаж байгаа нь ашиг сонирхлыг зөрчил үүсгэх үндсэн нөхцлийг бүрдүүлж байна.