ХАР ТАМХИЧДЫН ТОО ЖИЛЭЭС ЖИЛД НЭМЭГДЭЖ БАЙНА

    Хар тамхичин болох амархан. Нэг орой найзыгаа “шоудъя” гэж дуудахад нь дагаж очоод хар тамхичдын бүлэглэлд өөрийн мэдэлгүй орчихоод гарч чадахгүй байгаа залуус олон байна. Түүнийг дуудаж авчирсан найз нь томчуудтайгаа буюу ах нартайгаа дотно танилцуулдаг. Тэд нар нь танилцаж, ах, дүү, найз нөхөд болж байгаагаа тэмдэглэж байгаа нь энэ гээд баарыг зөвхөн түүнд зориулж бэлдсэн юм шиг шоу зохиож, баарны хүүхнүүдийг ч мөн худалдаж авч өгдөг. Ингээд нэг оройны шоуг болон өөрсдийгөө дахин мартагдахааргүй болтол нь, сэтгэлд хоногштол нь тэмдэглэж өгдөг. Тэгэх үедээ шоуны гол дүр болсон хар тамхичдын бүлэглэлд шинээр орох залуугийн хувийн мэдээлэл, хэдий хэмжээний хөрөнгөтэй болохыг нь мэдэж авдаг. Дараагийн удаа түүнтэй дахин уулзахын тулд хүүхнүүдтэй хамт амралтанд дагуулж яваад хоёр, гурав хоногийн шоу зохион байгуулдаг. Тэр үедээ баян айлын мөнгөтэй залууг хар тамхинд уруу татаж бас татуулж үзүүлдэг. Анх удаа татаж үзэж байгаа залуугийн зураг, бичлэгийг тэд нууцаар хийж, хадгалдаг. Дараагийн удаа хар тамхи авхуулах гэсэн сүрдүүлэгийн арга нь тэр. Ингээд сайхан амьдарч байсан гэгээн мөрөөдөлтэй нэг залуу хар тамхинд толгойгоо мэдүүлж, татахгүй л бол, шоудахгүй л бол үхчих гээд байдаг болно. Ингэж буруу замаар орж эхэлсэн үедээ тэд ямар ч аргаар хамаагүй хар тамхи авахын тулд эхэндээ аав, ээждээ худлаа хэлж байнга шахуу мөнгө авдаг болно. Дараа нь гэрээсээ хулгай хийдэг болж, өөрт байгаа үнэтэй, өөдтэй болгоноо зарж үрэх үедээ аав, ээждээ баригдаж эхэлдэг. Гэрийнхэндээ баригдаад мөнгөгүй болчихсон болохоор хар тамхи олохын тулд дараагийн мөнгөтэй хүүхэд, залуусыг онилж бүлэглэлдээ дээрх аргаар оруулаад түүгээр хар тамхиа зөөлгөдөг болно. Тэгсээр байгаад хар тамхины бүлэглэлд мөнгөтэй айлын хүүхдүүд өдрөөс өдөрт хэд хэдээрээ нэмэгдэж, нийлж шоудах нэрээр хар тамхичид болцгоодог. Хамгийн аймар нь нэг л удаа хар тамхи өндөр тунтай хэрэглэсэн бол дахин гарч чаддаггүй. Үхэн үхтлээ хар тамхины хамааралтай болдог. Баячуудын хүүхдүүд хамгийн үнэтэй тамхийг хэрэглэдэг бол сургуулийн насныхан судсандаа мансууруулах төрлийн бодис, эм тарьж, хэд хэдээрээ гар, хөлгүй болж байгаа харамсалтай явдал сүүлийн үед газар аваад байгаа. 

ХАР ТАМХИЧИД ЯЛАА МӨНГӨӨР НАЙМААЛЦДАГ ГЭХ

    Үүний хамгийн том жишээ бол баячуудын хүүхдүүд хар тамхи хэрэглэж, мансуурсан үедээ бусдыг хараагүй болтол нь зодсон гэх хэрэг юм. Хар тамхи хэрэглэж, бусдыг зодсон гэх олон хэргүүдээс зөвхөн олон нийтэд ил болсон нь УИХ-ын гишүүн асан Ц.Цэрэнпунцагийн хүү Санжаачойпэл, “Эрэл”-ийн Б.Эрдэнэбатын хүү Тэмүүлэн, “Таванбогд” группын захирал Ц.Баатарсайханы хүү Амарсайхан  гээд томоохон компанийн эзэд, улстөрчдийн хүүхдүүдийн хэрэг болчихоод байгаа. Энэ бол зөвхөн ганц жишээ. Хэрэгт холбогдсон зарим залууг 48 цагийн хугацаатай баривчилж, хар тамхины сорил авсан боловч хариу нь хараагүй байгаа гэх тайлбарыг цагдаа нар өгсөн. Харин зарим нь хэрэг хийсэн даруйдаа хилээр гарч, зугтсан гэдгийг өчигдөр цагдаагийн байгууллагаас мэдэгдсэн. Одоогийн байдлаар зодоон болох үед камерын бичлэгт үлдсэн 40-50 залуугаас хар тамхины сорил авах ажиллагаа үргэлжилж байгаа гэх.

ХАР ТАМХИНЫ ХЭРЭГТ ХОЛБОГДСОН МОНГОЛЫН ОДУУД 

    Нийгэмд дуулиан тариад залуучуудаас хар тамхи илэрвэл тэд ял авах ёстой. Гэвч зарим хар тамхичид цагдаа нарт баригдсан ч ялаа мөнгөөр наймаалцдаг гэх яриа байдаг. Цагдаа нар ч хэний хэн ямар төрлийн хар тамхи хэрэглэж байгааг нь мэддэг мөртлөө яаж ч чадахгүй, толгойг нь илээд өнгөрөөдөг гэдэг нь ч цуу яриа биш биз. Яагаад гэвэл хар тамхичдын дунд их хэмжээний мөнгө байнга эргэлдэж байдгийг цагдаа нар ч мэддэг. Мөн нэр алдартай, рок попынхон, тамирчид гээд жил ирэх тусам хар тамхины хэрэгт холбогдож байгаа олны танил залуус нэмэгдэж байна. Өмнө нь “Харанга” хамтлагийн дуучин, МУГЖ Х.Лхагвасүрэн, “Лемонс” хамтлагийн аргил гитарчин Б.Анар болон рок хөгжим сонирхогч Г.Билгүүн, Б.Билгүүн, Н.Энх-Учрал, Н.Инжинаш, О.Содбилэг, Э.Бархас,  “Дижитал” хамтлагийн ахлагч Баавар “Гайз 666” хамтлагийн дуучин Г.Төгсбаяр, Л.Мягмар, Х.Лхагва,  “А-Capella” хамтлагийнхан гээд л урлагийнхны хар тамхи хэрэглэгчдийн цуваа хөвөрдөг. Харин сүүлийн үед Morningstar буюу Б.Аззаяа, Жүжигчин Б.Энхтүвшин, “Мотив" хамтлагийн дуучин Жижгээ буюу Г.Эрдэнэбаяр, “Icetop" хамтлагийн дуучин С.Чулуунбаяр, “Guys” хамтлагийн дуучин Х.Бат-Ундрал, дуучин Б.Амархүү, дуучин DON DIOR, реппэр Roockie буюу У.Мөнхбагана нар хар тамхины хэрэгт холбогдож байв.