УИХ-ын гишүүн асан Ц.Цэрэнпунцаг, “Эрэл”-ийн Б.Эрдэнэбат нарын хүүхдүүд нийлж бусдыг зодож хүнд гэмтэл учруулсан гэх мэдээлэл олон нийтийн сүлжээгээр цацагдсан. Тодруулбал, өнгөрсөн бямба гарагт буюу долоодугаар сарын 19-ны 03:00 цагийн үед орчимд Сүхбаатар дүүрэгт дээрх хэрэг гарчээ. Хохирогч болох 25 настай залууг “Cante”, “Zu” гэх шөнийн клубийн гадна утсаар ярьж байхад нь мөргөж унагаагаад, дэвсэж эхэлсэн гэх. Хохирогчийн биед гурван хүн халдсан бөгөөд хохирогчийн ар гэрийн мэдээлж буйгаар УИХ-ын гишүүн асан Ц.Цэрэнпунцагийн хүү С, “Эрэл”-ийн Б.Эрдэнэбатын хүү Т болон мөн нэг төрийн албан тушаалтны хүү байсан гэх. Гурав дахь этгээдийг олж тогтоохоор цагдаагийн алба хаагчид ажиллаж байгаа аж.

       Энэ талаар хохирогчийн эгчээс тодруулахад “УИХ-ын гишүүн асан Ц.Цэрэнпунцагийн хүү С, “Эрэл”-ийн Б.Эрдэнэбатын хүү Т нарын гурван этгээд дүүг минь зэрлэг балмадаар зодсон хэрэг гарсан. Тэднээс хар тамхи илэрсэн нь шинжилгээгээр тогтоогдсон. Одоогийн байдлаар хохирогчийн биеийн байдал маш хүнд, нэг нүд нь харахгүй байгаа. Мөн нүүр, болон хамрын яс нь хэд хэдэн удаагийн хугаралта, хамар нь цөмөрсөн. Сүхбаатар дүүргийн цагдаагийн газраас дээрх хэргийг мөрдөн шалгаж байгаа. Мөн бид шүүх эмнэлэгийн дүгнэлтийг хүлээж байна. Шалгалтын ажиллагаа болон шүүх шинжилгээний дүгнэлт үнэн, зөв гараасай гэж хүлээж байна. Одоогоор үүнээс илүү мэдээлэл өгөх боломжгүй байна” гэсэн юм.