Цагдаагийн Ерөнхий газраас цаг үеийн асуудлаар мэдээлэл өглөө. Энэ үеэр Кибер гэмт хэрэгтэй тэмцэх газрын дарга С.Тайван “Цахим гэмт хэргийн шинжтэй дуудлага мэдээлэлд мөрдөн шалгах ажиллагааг хойшлуулалшгүйгээр явуулаад 26 иргэн учирсан 161 сая төгрөгийн хохирлыг иргэдэд буцаан төлүүлсэн үр дүнтэй ажиллаж байна. Залилантай холбоотой дуудлага, мэдээлэлд дүн шинжилгээ хийхэд иргэд байр худалдаж авах, машин авах, сүүлийн хоёр сарын хугацаанд өвс, малын тэжээл авах нэрээр цахим орчинд байршуулсан хуурамч зарлалд итгэж, их хэмжээний мөнгө шилжүүлж, залилуулж байгаа тохиолдол түгээмэл байна. Цахим залилангийн хохирогч болсноо мэдсэн даруйдаа цагдаагийн байгууллагын 102 дугаарын утсанд хандаж, гомдол, мэдээлэлээ өгөх хэрэгтэй. 17 настай иргэн Ш нь 283 иргэний фэйсбүүк хаягыг хакердаж, 29 иргэнээс 13 сая төгрөг шилжүүлж авсан болох нь тогтоогдсон. Үүнээс гадна. “Токи” аппликейшн дээр машин худалдах нэрээр зар байршуулж иргэний хувийн мэдээлэл буюу банкны картын мэдээллийг авч, “Токи”  аппликейшнаар оруулж дансан дахь мөнгийг нь хулгайлж байна. Цахим үйлчилгээ явуулж буй компаниудын цоорхойг ашиглан их хэмжээний мөнгө хулгайлах гэмт хэргийг илрүүлсэн” гэв.