ЗУДЫН ХАЖУУГААР НЭРМЭЭС БОЛЖ ЯВАА УЛСТӨРЧДИЙГ ТООХ МАЛЧИН БАЙХ УУ

        Улстөрчид цас, зудан дундуур сонгуулийн шоу хийх гээд үхэн хатан зүтгэж байна. Цасанд суусан машин түрэлцэж, асааж чадахгүй байгааг нь маниулдаж ч байна. Даахгүй байгаа өвс, хивэгийг нь тэд л өргөж, үүрч явна. Үүний хэрээр малчдын хотонд авхуулсан улстөрчдийн зураг ч нэмэгдэнэ. Энэ жилийн зуд малчдад бэрхшээл, сонгуулийнханд сайхан шоу болж байна. Харин иргэд тэдний хэн нь хэн бэ гэдгийг сонгуулийн сурталчилгаатай, сурталчилгаагүй аль эрт таниад, мэдчихсэн. Тэдний элдэв янзын Пи-Ар, шоу, жүжиглэлтийг тоохоо больсон гэсэн үг. Дөрвөн жилийн өмнө сонгуулийн санал авахаар очсоноосоо хойш царайгаа харуулаагүй байж дахин сонгуулийн шоу хийгээд очиж байгаа нь ч тэдний дунд бий. Дөрөвхөн сарын дараа сонгууль болно.

      Энэ жилийн сонгууль бүсчилсэн тойргоос 126 гишүүн сонгогдох болсноороо онцлог. Өмнө нь зөвхөн нэг аймгийн иргэдийн саналаар бараг уулзах шаардлагагүй шахуу УИХ-ийн гишүүн болчихдог байв. Өөрөөр хэлбэл, улстөрчид хөдөөгүүр буюу тойрогтоо явахдаа дээгүүр харж, "Эд нар намайг сонгохгүй яах юм" гэсэн шиг байж байгаад л гишүүн болчихдог байлаа. Харин энэ жил гурван аймгийн иргэдийн саналаар гишүүн болох тул өрсөлдөөн ширүүсэж, сонгуулийн Пи-Ар нарийн болж байна. Тиймдээ ч улстөрчид олон айлын хотонд зураг авхуулж, зудан дундуур малчдад тал зассан шигээ худлаа инээж, малчдын зовлон, жаргалыг ойлгодог хүн шиг царайлж явна. Улстөрчид сонгуулийн жилийн хавар болгон хөдөөг зорьж, малчдад аяга, шанага, бидон сав өгч онигоонд орцгоодог. Харин энэ жил зуд зурханг өмнөө барьж, хивэг, өвс хүргэж, малчдад тусласан нэрийдлээр шоугаа хийцгээж байна. Зуданд зутарч яваа гэдгээ харуулсан зураг, бичлэгээ олон нийтийн сүлжээнд цацаж, зудын хажуугаар нэрмээс болж яваа улстөрчдийг тоох малчин байх уу.

УЛСТӨРЧДИЙН ПИ-АР МАШИН АСААЖ, ӨВС ҮҮРЭХЭЭС ЭХЭЛЖ БАЙНА

        Улстөрчид сонгуулийн жил болгон цагаан сарын дараа малчдаар явж, аяга, шанага, уут чихэр бэлэглэж, элдэв янзын хочтой болоод буцдаг байлаа. Харин энэ жил цас, зудтай байгааг ч хэлэх үү, улстөрчдийн Пи-Ар машин асаахаас эхэлж, бэлэг нь өвс, тэжээл болж өөрчлөгдөж байна. Хүнс, хөдөө, аж ахуйн хөнгөн үйлдвэрийн яамныхан малчдад хоёр шуудай хивэг хүргэж өгөхийн тулд найман ландтай хорин хэдүүлээ дагаж явсан. Хөдөөнийхөнд хайр зарлаж, найр тавих гэж багаараа явсан хэрэг үү,  яамныхан баян гэдгээ малчдад харуулах гэсэн болчимгүй үйлдэл байв уу. Тэдний энэ ёс зүйгүй үйлдлээр зогсохгүй Ардчилсан намынхан ч мөн туг хатгасан машинаар өвс зөөсөн нь дээрх хэргээс огт дээрдсэнгүй. Тэд өөрсдөө дээрх үйлдлээрээ малчдад тус хүргэж байгаа сайхан сэтгэл, тусч зан огт биш гэдгээ баталлаа. Энэ жилийн сонгууль ширүүхэн болно гэдгийг харууллаа. Улстөрчдийн хөдөөгүүр явж, шинэ тойргийнхондоо танигдах гэж элдвээр үзэж байгаа хэрэг юу ч биш. Томсгосон тойргийн сонгуулийн өмнө юм, юм болж мэдэхээр, улстөрчид юу ч хийхээс буцахааргүй болж байна.