“Ургацын баяр – 2023”- т зориулсан улс, аймгийн алдар цолтой хүчит 128 бөхийн барилдаан болсон. Тус барилдаанд Сүхбаатар аймгийн Онгон сумын харьяат, аймгийн хурц арслан Н.Өсөхбаяр түрүүлж, Өвөрхангай аймгийн Уянга сумын харьяат, улсын харцага Х.Гантулга үзүүрлэсэн билээ.

 Тус барилдааны хоёрын даваанд улсын заан Б.Серик сумын заан А.Тодмагнай нар барилдах үед Б.Серик унасан бөхийг нидэрч байгаа үйлдэл телевизийн дуранд өртөж, бөх сонирхогчдын эгдүүцлийг хүргэсэн. Б.Серик заан уг үйлдэлдээ уучлалт хүссэн байдаг. Тэрбээр "Өнөөдрийн барилдааны хоёрын давааны барилдаанд үнэхээр муухай үйлдэл гаргасан байна. Зүй бус үйлдэлдээ нийт бөхөө дэмждэг ард түмнээсээ уучлалт гуйж байна. Монголын үндэсний бөхийн холбооны гаргах шийдвэрт хариуцлага хүлээх болно. А.Тодмагнай дүүгээсээ уучлалт гуйж байна. Дүүд томоос том амжилт хүсье" гэсэн юм.

Харин Монголын үндэсний бөхийн холбооноос Б.Серикийн барилдах эрхийг нэг жилээр хасах шийдвэр гаргасан билээ. Уг шийдвэрийг бөх сонирхогчид эсэргүүцэж, сэтгэгдлээ илэрхийлж байгаа юм.

Тэгвэл бид улсын заан Б.Сериктэй холбогдож, энэ шийдвэртэй санал нийлж байгаа эсэх талаар тодруулахад “Энэ талаар мэдээлэл өгмөөргүй байна. Монголын үндэсний бөхийн холбооныхонтой уулзаагүй, гомдол гаргаагүй. Яах учраа сайн мэдэхгүй байна” гэлээ.