Зэвсэгт хүчний алба хаагч амиа алдсан асуудалтай холбоотой Зариг.мн мэдээллийн сайтаас "Дахиад өгөх амь алга, одоо зогсоо" хэлэлцүүлэг зохион байгуулж байна. Энэ үеэр цэрэгт яваад хохирсон алба хаагч болон ар гэрийнхэн байр сууриа илэрхийлж байна.
Өмнөговь аймгийн Зэвсэгт хүчний 167 дугаар ангид алба хааж байсан байлдагчийн ээж: Миний хүү 2022 оны аравдугаар сард цэргийн албанд мордсон. Ингээд тангаргын баяраас 10 хоногийн өмнө цэргийн ангиас залгаад "Хүүхэд чинь хагалгаанд орохоор болсон" гэсэн. Хэвлийгээрээ ус дүүрэлттэй гэсэн. Улаанбаатар хотоос яваад очиход хагалгаа нь дууссан байсан. Ангийн захирагч, штабын дарга, цэргийн эмч нар нь байсан. Гадны нөлөөгүй биз дээ гээд бие нь тэнхрээгүй хүүхдээс байнга асуугаад байсан. Энэ ангид өнгөрсөн жил нэг цэрэг амиа алдсан. Үүний дараа энэ асуудал гарсан. Ангийн захирагч нь гомдолгүй гэдэг бичгээ өг гэж над руу салаан даргаа явуулсан байсан. Хагалгаанд орсны дараа хүүгийн минь уруул сэтэрсэн байсан. Миний хүү хаалга мөргөсөн гэж надад хэлсэн. Гэхдээ хээрийн бэлтгэлд ямар хаалга мөргөх вэ дээ. Дараа нь бүх зүйл болоод өнгөрсний дараа ахлагч н.Мягмарнаран гэдэг хүн зодсон гэж аавдаа хэлсэн байсан. Уг нь миний хүү Солонгос Улс руу виз мэдүүлээд явах гэж байсан ч цэрэгт аваад явчихсан юм. Өмнөговь надад танидаг хүн байхгүй учраас би хагалгааны дараа хүүгээ аваад хотод ирсэн. Гэтэл тангараг өргөөгүй цэрэг манайд хамаагүй гээд хүлээж аваагүй. Гэтэл дараа нь цэргийн алба хаасан гэсэн бүртгэл И-Монголиа дээр гарсан байна лээ.
УИХ-ын гишүүн Б.Энх-Амгалан: Энх цагт амиа алдсан цэргийн алба хаагчдын ар гэрийнхээс уйчлалт гуйж, эмгэнэл илэрхийлье. Өмнө парламентын үед Батлан хамгаалах багц хууль батласан. Үүгээр цэргийн амьдрах орчин болон алба хаагчдын цалин хөлсийг баталсан. Эцэг эхчүүдийн зүгээс хүний ёсоор хүнд хандах асуудлыг л ярьж байна. Тиймээс үүнийг анги нэгтгэлийн удирдлагууд анхаарч үзэх хэрэгтэй.
ЦЭРГИЙН АЛБА ХААГЧИЙН ЭЭЖ: Миний хүү тангаргаа өргөхөөс 10 хоногийн өмнө ахлагчдаа зодуулаад хагалгаанд орсон |
|