ОХИНЫГ МИНЬ НАСАНД ХҮРЭХЭЭРЭЭ ӨӨРӨӨ ИРЭХ ЮМ БАЙНА ГЭСЭН

    Дорноговь аймгийн 12 настай охиныг хөнөөсөн Г.Гантулгыг зургаан жилийн өмнө сураггүй болсон Д.Сэржмядагийн хэрэгт холбогдуулан шалгаж байгаа. Шалгалтын ажиллагаа хэрхэн үргэлжилж байгаа талаар Д.Сэржмядагын ээж Б.Хоролмаагаас тодрууллаа. 

-Таны охины хэрэгт 12 настай охиныг хөнөөсөн Г.Гантулгыг шалгаж байгаа гэсэн. Хамгийн сүүлд цагдаа нар та бүхэнд ямар мэдээлэл өгсөн бэ?

     -Охины минь хэрэгт түүнийг шалгаж байгаа нь үнэн гэж цагдаа нар хэлсэн. Тэгээд нэмэлтээр хэдэн хүнээс байцаалт авсан юм шиг байна лээ. Гэхдээ би түүнийг охиноос минь холуур өнгөрсөн байгаасай гэж залбирч сууна. Дорноговь аймагт 12 настай охин сураггүй болсон гэх мэдээлэл олон нийтийн сүлжээгээр цацагдсанаас хойш зүрх өвдөж, даралт ихсэж, сэтгэл санаа хямарч эмнэлэгт хэвтсэн. Саяхан түүнийг охины минь хэрэгт холбогдуулан шалгаж байгаа гэдгийг сонсоод мөн хямарч сууна. Гэхдээ зөвхөн миний охины хэрэгт шалгаагүй юм билээ. Өнгөрсөн хугацаанд сураггүй болсон бүх хүүхдийн хэрэгт холбогдуулан шалгах байх. 

-Таныг цагдаа нар хамгийн сүүлд хэзээ дуудсан бэ. Хуулийн байгууллагынхан эрлийн ажиллагааг хэрхэн үргэлжлүүлж байгаа бол?

      -Өнгөрсөн дөрөвдүгээр сард Замын-Үүдэд дуудаж, дахин ганц, хоёр зүйл тодруулсан. ЦЕГ-ын Онц хүнд гэмт хэрэгтэй тэмцэх хэлтсийн цагдаа, Дорноговь аймгийн цагдаа, Замын-Үүдийн цагдаа нар хамтран ажиллаж, эрлийн ажиллагааг үргэлжлүүлж байгаа гэж надад хэлдэг. Би ЦЕГ-т өөрөө очиж, тодруулдаг. Харин Тагнуулын Ерөнхий газрынхан хэрхэн ажиллаж, юу хийдгийг нь мэдэхгүй. Мөн үе үеийн дарга нар, Хууль зүйн сайд нь ямар ч арга хэмжээ авдаггүй. Охины минь эрлийн ажиллагаанд анхаарал хандуулдаггүй юм шиг санагддаг. Би шинээр сайд болсон Б.Энхбаярт тусгайлан өргөдөл, гомдол бичиж өгнө гэж бодож байна. 

-Та хил нээгдэхээр Өвөрмонголоор охиноо хайна гэж байсан. Охиндоо сураг, чимээ тавьж байна уу?

     -Одоохондоо охиноо хүлээгээд л сууж байна. Саяхан Дорноговь аймгийн 12 настай охин сураггүй болоход би охиноо дахин нэг хүнээс асуусан. Тэгэхэд “Охин чинь насанд хүрээд өөрөө эргэж ирэх юм байна. Хүлээж бай” гэсэн. Өмнө нь мөн нэг хүнээс асуухад охиныг минь “Өөрөө ирэх юм байна” гэсэн болохоор итгэл, найдвар тээгээд л, баян хангайдаа цай, сүүнийхээ дээжийг өргөөд л сууж байна. Өнгөрсөн хугацаанд нэлээд хүн дээр очиж охиноо асуулаа. 

-Тэгэхээр бас нэлээн удаан хүлээх нь дээ, танайхан?

    -Охины минь төрсөн өдөр хоёрдугаар сарын 10-нд болдог. Энэ жил 15 нас хүрэх ёстой. Хэзээ ирэхийг нь, ирэх, үгүйг нь мэдэхгүй болохоор үнэхээр хэцүү юм. Монголчууд бүгдээрээ л миний охинд санаа зовж байна. Хэрвээ охин минь олдвол Монголчууд бөөнөөрөө баярлах байх даа. 

-Та "Хархорин" захад ажилладаг хэвээрээ юу?

     -Одоогоор зээ охиноо хараад гэртээ байгаа. Хань минь хувийн компанид ажиллаж байна. Бага хүү Энэтхэгт сурч байгаа. Манайх бууриа сэлгэвэл охины минь сураг гарч мэднэ гээд л хотод нүүж ирсэн. Одоогоор сураггүй л байна даа. 

 Д.Сэржмядаг охин ор сураггүй алга болоод зургаан жил болж байна. Тэрбээр Дорноговь аймгийн Замын-Үүд сумын Ерөнхий боловсролын II сургуульд сурдаг байв. Д.Сэржмядаг сураггүй алга болох үедээ 130-150 см өндөртэй, цэнхэр дотортой, ягаан өнгийн даавуун куртик, ягаан өнгийн сурагч цүнхтэй, сурагчийн дүрэмт хувцастай, хар өнгийн ноосон өмд, хүрэн өнгийн урт түрийтэй гуталтай явсан гэдэг. Цагдаагийн байгууллагаас уг хэрэгт мөрдөн шалгах ажиллагааг тасралтгүй явуулсан боловч одоог хүртэл сураг ажиг гараагүй билээ.