Төв аймгийн Батсүмбэр сумын Цогт-Өндөр багийн Өлгийн даваа гэдэг газарт зам тээврийн ноцтой осол гарч, нэг иргэн нас баржээ. Тодруулбал, өчигдөр 00:25 цагт иргэн Л-ийн жолоодож явсан Зил 131  загварын ачааны автомашинтай 11 иргэн самар түүгээд буцаж явахдаа 60 метрийн өндөр хавцал руу унасан байна. Ослын улмаас зургаан  иргэн бэртэж, нэг хүн нас баржээ. 

Төв аймгийн Онцгой байдлын Ерөнхий газрын алба хаагчид, сумын Эрүүл мэндийн төвийн ажилтнууд 32 настай эрэгтэй Б, 36 настай эрэгтэй Э, 38 настай эрэгтэй М, 63 настай эрэгтэй М, 35 настай эрэгтэй Л, 46 настай эрэгтэй Б нарыг  сумын Нэгдсэн эмнэлэгт хүлээлгэн өгч, 36 настай эрэгтэй Г-ийн  цогцсыг Төв аймгийн Батсүмбэр сумын Цагдаагийн хэсэгт шилжүүлэн өгсөн аж.

Мөн Хэнтий аймгийн Батширээт сум Өндөр даваа гэх газарт шороон замд тоёота пробокс маркийн автомашины жолооч согтуугаар жолоо барьж яваад замын хажуугийн мод мөргөж 60 настай эрэгтэй Б-гийн амь нас хохирчээ.

Тээврийн цагдаагийн албаны Жижүүрийн шуурхай удирдлагын хэлтэст аравдугаар сарын 26-29-нд зам тээврийн ослын шинжтэй 984  дуудлага, мэдээлэл бүртгэгдэж, ослын улмаас 12 хүн гэмтэн, орон нутагт зургаан хүний амь нас хохирсон байна.