Хөвсгөл аймгийн Түнэл суманд хоёр хүний амийг хэрцгийгээр хөнөөж, хэргийн газраас зугтсан хэрэг долдугаар сарын 6-нд гарсан. Тэгвэл уг хэрэгт холбогдон, эрэн сурвалжлагдаж байсан Түнэл сумын харьяат 29 настай эрэгтэй О нь Арбулаг сумын Цагаан булангийн хясаа гэх газар өөрийгөө буудаж, амиа егүүтгэсэн байдалтай олджээ.

       Хэргийн талаар эргэн сануулбал, Хөвсгөл аймгийн зургадугаар багийн харьяат 29 настай О нь архидан согтуурч, иргэн Э,  Б нарын аминд хүрсэн.

       Энэ талаар тус сумын Засаг дарга Д.Цогбаяраас тодруулахад “Өнгөрсөн шөнө хоёр хүний амийг бүрэлгэчихээд зугтсан хэрэг манай сумын төвд гарсан. Тус хэрэг нь 00:30-02:00 цагийн хооронд болсон.  Тодруулбал, манай сумын зургадугаар багийн иргэн О архидан согтуурч иргэн Э, Б нарын аминд хүрсэн. Сэжигтэн О-ийн хувьд эзэмшсэн боловсрол, эрхэлсэн тодорхой ажилгүй, хөдөө мал малладаг залуу. 29 настай хохирогч Э нь сэжигтний найз байсан бол  хохирогч Б нь 40 гаруй насны хүн байсан” гэсэн юм.

       Харин зарим эх сурвалж "Иргэн О нь согтууруулах ундаа хэрэглэсэн үедээ иргэн Э-ын амийг хөнөөж, зугтаж явахдаа хохирогч Б-ийн хаалгыг эвдэж амийг хохироосон байж болзошгүй"  гэж байлаа.