Сэлэнгэ аймгийн Шаамар сумын Эрүүл мэндийн төвийн эмч 31 настай эрэгтэй Б коронавирусийн халдвар авсан нь батлагдан, тус эмнэлэгт хэвтэн эмчлүүлж байсан 14 настай охиныг хүчирхийлэхийг завдсан хэрэг гарсан талаар бид мэдээлсэн. Тэгвэл албан бус эх сурвалжийн мэдээлснээр уг хэргийн сэжигтэн тус Эрүүл мэндийн төвийн дарга Б.Бат-Эрдэнэ юм байна. Тэрбээр Шаамар сумын Эрүүл мэндийн төвийн даргаар өнгөрсөн хоёрдугаар сараас эхлэн ажилласан бөгөөд өмнө нь Сэлэнгэ аймгийн Жавхлант суманд эмчээр таван жил ажиллаж байжээ.

      Энэ талаар Шаамар сумын Эрүүл мэндийн төвийн ажилтнаас тодруулахад нэрээ нууцлахыг хүсээд “Б.Бат-Эрдэнэ эмч манай эмнэлэгт ирээд удаагүй. Өмнө нь Жавхлант сумын Эрүүл мэндийн төвд таван жил ажилласан юм билээ. Эмч нараас Б.Бат-Эрдэнэ ганцаараа ковидын тасагт ажиллаж байгаа. Бага насны хэчнээн хүүхэд ковидын тасагт хэвтэн эмчлүүлж байгааг мэдэхгүй байна. Ковидын гурван тасагт 100 гаруй ор байгаа” гэв.

Харин Шаамар сумын Эрүүл мэндийн төвийн дарга Б.Бат-Эрдэнээс уг хэргийн талаар тодруулахад “14 настай охины ар гэрийнхэн “Охиныг маань хүчиндэхийг завдсан” гэж цагдаагийн байгууллагад дуудлага өгсөн байна лээ. Одоогоор өвчтнөө хүчиндэхийг завдсан эсэх нь тодорхой болоогүй байна. Сэлэнгэ аймаг дахь Цагдаагийн газарт энэ хэргийг шалгаж байгаа. Дараа дараагийн байгууллагууд үнэн эсэхийг тогтоох байх. 14 настай охины хувьд коронавирусийн халдвар авсан нь тогтоогдон эмчлүүлж байсан. Үүнээс өөр мэдээлэл өгөх боломжгүй” гэж ярьсан билээ.