-Шүүхийн ёс зүйн хороонд тэдэнтэй холбоотой гомдол ирээгүй учир хариуцлага тооцох боломжгүй-

Шүүгч нар биеэ үнэлэлт зохион байгуулсан байж болзошгүй бичлэг ил болоод байгаа. Энэ талаар Шүүхийн ёс зүйн хорооны Ажлын албаны дарга Н.Ганбаатараас тодрууллаа.

-Х.Идэр, Д.Отгонбаатар тэргүүтэй шүүгчидтэй холбоотой ёс зүйгүй бичлэг ил болоод байгаа. Шүүхийн ёс зүйн хорооноос тэдэнд  ямар нэгэн хариуцлага тооцох уу?  

-Х.Идэр, З.Болдбаатар, Д.Отгонбаатар нартай холбоотой мэдээллийг цахим сүлжээнээс үзсэн. Шүүхийн ёс зүйн хороо иргэн, албан тушаалтан, хуулийн этгээдийн гаргасан гомдлыг 30 хоногийн дотор шалгаж, шаардлагатай бол дахин 30 хоногоор сунгаж, шийдвэрлэдэг. Гомдол шалгах ажиллагааг Шүүхийн ёс зүйн хорооны дарга, гишүүдийн өгсөн үүрэг даалгаврын дагуу захирамжаар гүйцэтгэдэг. Энэ дагуу гомдлыг шалгаж, хуралдаанд оруулдаг. Шүүхийн ёс зүйн хороонд дээрх хүмүүстэй холбоотой гомдол одоогоор ирээгүй байна.

-Шүүхийн ёс зүйн хорооноос гомдол ирээгүй учир хариуцлага тооцох боломжгүй гэсэн үг үү?

-Иргэн, хуулийн этгээдээс гомдол ирээгүй учраас шалгах эрх зүйн орчин байхгүй. Бид гаргасан гомдлын дагуу л шалгах үүрэгтэй. Одоогоор бодит бус мэдээллийн талаар мэдэхгүй байна. Эрүүгийн журмаар шийдвэрлэх нь тусдаа процесстой.

-Шүүгч нар биеэ үнэлэгч авах нь ёс зүйд нийцэх үү?

-Цахим сүлжээнд тавигдаад байгаа бичлэг дээрх хүмүүсийн зургийг хараад бүрэн таних боломжгүй байна. Биеэ үнэлэгч мөн эсэхийг  шалгадаг газрууд нь шалгах байх. Мөн бичлэг дээрх хүмүүсийг шүүгч мөн эсэхийг би мэдэхгүй, танихгүй. Шүүхийн ёс зүйн хороо шүүгчидтэй харилцдаггүй.

-Шүүхийн ёс зүйн хороонд шүүгчидтэй холбоотой гомдол, мэдээлэл хэр олон ирдэг вэ?

-Шүүхийн ёс зүйн хороонд жилд 200 гаруй гомдол ирдэг.