• Өнөөдөр 2024-03-29

Ё.БААТАРБИЛЭГ: Өчнөөн олон жил төрд ажиллачихаад юу ч үгүй хоосон царайлаад сууж байгаадаа ичиж байна

2023-04-25,   1333

   Хөгжлийн банкны хэргийн 80 хүн, дөрвөн хуулийн этгээдэд холбогдох шүүх хурал үргэлжилж байна. Тус хэрэг яллагдагчаар татагдсан УИХ-ын гишүүн Ё.Баатарбилэг мэдүүлэг өглөө. Түүний мэдүүлгийг эхээр нь танилцуулж байна. 
    УИХ-ын гишүүн Ё.Баатарбилэг мэдүүлэгтээ “2022 оны дөрөвдүгээр сарын 22-ны өдөр АТГ-аас дуудсан. Надаас өмнө нь нэг ч удаа мэдүүлэг авалгүйгээр яллагдагчаар татах тогтоол танилцуулсан. Өнгөрсөн хугацаанд дуудсан цагт нь 10 гаруй удаа очиж, амаар болон бичгээр мэдүүлэг өгч ирсэн. 2022 оны арваннэгдүгээр сарын 3-ний өдөр хэргийн материалд гарын үсэг зурсан. Хууль хяналтын байгууллагын тавьсан шаардлагыг УИХ-ын гишүүний бүрэн эрхийг ямар ч хамгаалалтгүйгээр, иргэний хувиар биелүүлээд явж байгаа. Сүрхий дарамтад оруулдаг юм билээ. Амаргүй цаг хугацаа байлаа. Дуудсан цагт нь очоод байдаг шаардах хуудас өгөөд байсныг манай өмгөөлөгч нар ч гайхаж байсан. Хуулийн байгууллагаас надад хоёр зүйлээр эрүүгийн хэрэг үүсгэсэн. Нэгдүгээрт, үндэслэлгүй хөрөнгөжсөн, хоёрдугаарт “НВЦ” компанид давуу байдал олгосон байж болзошгүй гэж үзсэн. 
 
Намайг хөрөнгө орлого нь 388 сая төгрөгөөр нэмэгдсэнийг тайлбарлаж чадахгүй байгаа гэж байна. Би үндсэндээ хувийн амьдралаа ярих болж байна. Би АТГ байгуулагдсанаас  цагаас хойш ХОМ-ээ тогтмол өгч байгаа. Би 2007 онд хуулийн дагуу АНУ-аас автомашин импортлох бизнес эрхэлдэг байсан. Тухайн үед би хоёр орон сууцтай, нэг жийп автомашинтай гэж мэдүүлж байсан. 15 жилийн дараа буюу одоо бас л хоёр орон сууцтай, нэг жийп автомашинтай л байна.  2013 оны дөрөвдүгээр сард АНУ руу сургуульд явах гэж байхад АТГ-аас дуудаж, яллагдагчаар татсанаа танилцуулж байсан. Тэр үед АТГ-ын гүйцэтгэх ажилтнууд Улаанбаатар хот болон Архангайд байгаа миний хоёр байранд нэгжлэг, үзлэг хийж байсан. Юм гараагүй болохоор Зүүнхараагийн мөрдөнд хоёр сар түгжиж байгаад суллаж байсан. Аймгийн дарга нарын хэрэг гэж тухайн үедээ яригдаж байсныг санаж байгаа байх. Энийг яагаад ярьж байна гэхээр, би одоог хүртэл тэр хоёр байраа л эзэмшиж байгаа. 
 
Автомашины тухайд, би 2008 оны Lexus 570 автомашин унадаг байсан. Тэрийгээ арай шинэчлэх гээд 2017 онд 130 сая төгрөгөөр 2013 оны Lexus 570 болгосон. Би шинэ автомашин авч чадахгүй, угаасаа хуучин л автомашин унадаг. Гэтэл 130 сая төгрөгөөр худалдаж авсан автомашинаа 100 сая төгрөгөөр худалдаж авсан гэж худал мэдүүлсэн гэж хавтаст хэрэг дотор бичсэн байна лээ.  АТГ-аас надаас амаар мэдүүлэг авахдаа энэ тухай дэлгэрэнгүй асуух болов уу гэсэн чинь асуугаагүй. Нэн удаа амаар байцаалт өгч байтал байцаагчийнх нь утас дуугараад мэдүүлгээ зогсоочихсоныг энд дурдъя гэж бодож байна. 

Сүүлдээ миний ах дүү, хамаатан садны хоорондын өр төлбөр, гэрээ сэлтийг хүртэл оруулж ирээд, миний төрсөн дүү, хүргэн хоёрыг татчихсан л явж байгаа. Миний хүргэнийг дарамтлаад, барьж хориод, нөгөөдөх нь сандарсандаа юу ч гэж ярьсан юм бүү мэд. Ний нуугүй хэлэхэд, үнэхээр одоо ийм юм яриад сууж байгаадаа ичиж байна. Өчнөөн олон жил төрийн ажил хийчхээд юу ч үгүй хоосон царайлаад сууж байгаадаа ичиж байна. 

     Ц.Баатарбилэг бид хоёрын тухайд, 1990 оноос найзалж байгаа. Мундаг бизнесмен гэж хардаг. Гэхдээ хэн хэнийхээ хувь, хувьсгалын ажилд оролцдоггүй зарчим байна. Монголын өндөгний хэрэглээг хангана гээд өөдрөг бизнес яриад явж байдаг найзууд. Найз нөхөд гэхээр л холбоод байвал Монгол чинь жижигхэн. Мөнгө төгрөг дамжуулсан гэж нэг юм яриад байгаа. Хоёр жолооч гэж яриад байгаа ч мэдүүлэг нь хоорондоо зөрүүтэй. Дахиад л хувийн амьдралаа ярих нь. 2016 оноос хойш миний хүү эмчилгээ хийлгэж, 2017 оны 7 сар хүртэл Солонгост хагалгаа хийлгэсэн. Хоёр ч том хагалгаанд орсон. Зардал их гарсан учраас хамаатан садан, найз нөхөд  чадахаараа л тус дэм болцгоосон. Тэр үед JCI гээд ТББ-ын манай найзууд ам.доллар, төгрөг нийлсэн 20 орчим сая төгрөг дэм болгож өгсөн. Тэр үед би өөрөө ажил ихтэй байсан учраас тэр мөнгийг нь жолооч очиж авсан юм шиг байна лээ. Тэр мөнгийг нийлүүлэлцсэн манай найзууд хүртэл хэд хэдэн төгрөг өгснөө тайлбарласан мэдүүлэг нь хавтас хэрэгт байгаа. 
 
Олигарх болтлоо баяжчихаад ханаж цадахгүй, хүүхдээ хүртэл төрийн мөнгөөр гадаадад сургаж байгаа түмэн амьтан шүү дээ. Тэднийг нийгмээрээ харж байгаа. Мөрөөрөө яваа мань мэтийг боорлож байхын оронд тэр хүмүүсийг шалгасан нь зүйтэй болов уу гэж бодож байна. Би ШУА-ын эрдэм шинжилгээний туслах ажилтнаар ажлын гараагаа эхэлсэн. ЕТГ-ын газарт референт, Н.Багабандийн шатар туслах, сайд, орон нутгийн ИТХ-д хоёр удаа, УИХ-д хоёр удаа гээд төрийн бүх шатанд ажиллаж үзсэн хүн энэ УИХ-д надаас өөр байхгүй байх. Яагаад энийг яриад байна гэхээр өнгөрсөн бүх хугацаанд би ямар нэг амин хувийн, бүлэг фракцын эрх ашиг хөөцөлдөж явсангүй. Мөрөөрөө ажлаа хийгээд явж ирсэн. Дарга дагаж ч далдганаж явдаггүй, чимээгүй, попроод байдаггүй, урдах ажлаа хийгээд яваад байхаар буруутай юм шиг харагддаг байж магадгүй. Цаг хугацаа харуулах байх, шүүх зөв шийдвэр гаргах байх л гэж хүлээж байна. 
 
Эцэст нь хэлэхэд, Хөгжлийн банк гэх энэ том дуулианыг яагаад дэгдээснийг хожим эргэж харах хэрэгтэй байх. Гурван сар дараалж нүсэр сонсгол явсан, одоо энэ танхимд асар олуулаа сууж байна. Нэг талаараа эмгэнэлтэй юм. Бизнес хийж, баялаг бүтээж байгаа хүмүүсийгээ арай өөр нүдээр харах байсан байх” гэлээ. 
 

Ё.БААТАРБИЛЭГ: Өчнөөн олон жил төрд ажиллачихаад юу ч үгүй хоосон царайлаад сууж байгаадаа ичиж байна
АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 0
Шинэ мэдээ
Нийтлэлчид
Монгол Улс, Улаанбаатар хот, Сүхбаатар дүүрэг, VIII хороо, "Ардын эрх"-ийн байр, Гуравдугаар давхарт Эргэлт.мн редакц
7509-1188