Өнгөрсөн есдүгээр сараас хойш давхардсан тоогоор 20 мянга гаруй иргэн, 200 орчим тэрбум төгрөгийн самрыг хушин ойгоос хууль бусаар түүж, байгаль орчинд нөхөж баршгүй хохирол учруулаад байна. Хууль бус гэж тодотгоод байгаагийн учир нь Байгаль орчин, аялал жуулчлалын сайд Д.Сарангэрэл хуш модны самар түүх, худалдах, экспортлохыг зөвшөөрсөн тушаал гаргамагцаа иргэд, аж ахуйн нэгжүүдийг ямар ч хяналтгүй хаячихсан. 

       Уг нь ойн тухай хуулиараа иргэн ахуйн зориулалтаар ихдээ 25 кг самар түүх зөвшөөрөлтэй бөгөөд нэг кг тутамд 500 төгрөг буюу 12500 төгрөгийн төлбөр төлж, зөвшөөрөл авах ёстой. Харин үйлдвэрийн зориулалтаар түүх аж ахуйн нэгж нэг кг тутамд 800 төгрөг төлж, зөвшөөрөл авах ёстой байдаг. Мөн аливаа хушин ойн нийт самрын 30 орчим хувийг түүж, үлдсэн 70 хувийг ан амьтдын хоол тэжээл, дараа жилийн ургацын үрэнд зориулж үлдээх ёстой байдаг. Гэвч Байгаль орчин, аялал жуулчлалын сайд Д.Сарангэрэл тушаал гаргаад, хэн хэдэн тонн самар түүх, хушин ойг яаж сүйтгэхээ “өөрсдөө мэд” гээд орхичихсон. Ингэснээр хэн хүссэн нь хушин ойд очиж, хуш модыг хөрөөдөж, мөчрийг нь хугалж, аварга мунаар мунадаж, нэг ч боргоцой үлдээхгүй түүж, хятад ченжүүдэд худалдаж, тэд нь урд хөрш рүү зөөсөөр эцэст нь Монголын хушин ой мөхлийн ирмэгт ирж, тэнд амьдардаг хэрэм, жирх, баавгай, гахай, шувууд идэш хоолгүй болж, устах аюулд ороод байна. Чухамдаа байгаль орчин, ой мод, ус ургамал, ан амьтанг хамгаалах ёстой салбарын сайд Д.Сарангэрэл нь өөрөө самрын “наймаачин” болчихсон, хятад ченжүүдтэй нийлж, иргэдээр самар түүлгэж, хушин ойг сүйдэлж байгаагаас өөрцгүй болчихоод байгаа юм. 

Дархан цаазат Богд хан уулын хушин ой хууль бус самарчдын гарт мөхөж, ан амьтад нь устаж үгүй болж буй эмгэнэлтэй дүр зураг биднийг угтсан. Тус ойд өнгөрсөн намраас хойш 3000-4000 самарчин очиж, тус бүрдээ 1-2 тонн самар хууль бусаар түүсэн гэх албан бус тоо байгаа. Үр дүнд нь тус хушин ойд нэг ч бүтэн мод, нэг ч боргоцой үлдээгүй бөгөөд эсрэгээрээ самарчдын отгууд, хог хаягдлаар дүүрсэн байгаа юм.