Сүхбаатар дүүргийн XI дүгээр хорооны нутаг дэвсгэрт байрлах “Хангай” хотхоны баруун талын байрны 12 давхраас 17 настай хүүхэд унаж, амиа алдсан харамсалтай хэрэг энэ сарын 30-нд гарсан. Энэ хэргийн мөрөөр дараах сурвалжилгыг бэлтгэлээ.

“Хангай” хотхоны баруун урд талд байх "Гэрэлтжин" хотхон (534 дүгээр байр)-ны II орцонд *** тоотод талийгаач эмэгтэй А.О оршин суудаг байжээ. Эх сурвалжийн хэлж буйгаар тус хотхоны нэгдүгээр орц 2016, хоёрдугаар орц 2018 онд ашиглалтад орсон юм байна. Талийгчийн гэр бүл II орцыг ашиглалтад орох үед нүүж ирсэн гэнэ. Тус хотхоны 534 дүгээр байрнаас бусад блок ашиглалтад ороогүй бөгөөд урд тал нь гадна тохижилт хийгдээгүй, талбайг цементлээгүй байв. Мөн урд талын хэсгийг барилгын дээврийн цэнхэр төмрөөр хашаалсан байлаа. Тэгвэл яг энэ хэсэгт буюу тус байрны урд талд хайрга чулуу ихтэй газарт талийгаач эмэгтэй унажээ. Хэргийн газарт очвол “Union PC” гэх хаягтай хаалганаас урагш 1.5-2 метрийн зайтай газарт нөж ихтэй цус газарт нэвчиж, хатсан байлаа. Мөн тус хэсэгт олон хүн холхисон болов уу гэмээр ул мөр үлдсэн байв. Энэ сэжүүрийн мөрөөр II орцны нэг давхрын айлаас уг хэргийн талаар тодрууллаа.

БИЕ НЬ БЯЦАРТЛАА УНАСАН ЮМУУ ГЭМЭЭР ХУВЦСАН ДОТРОО НЭЛЭЭН ТАРЧИХСАН БАЙСАН

НЭГ ДАВХРЫН ОРШИН СУУГЧ “01:00 цагийн үед болсон явдал. Хэдэн давхраас гэдгийг нь мэдэхгүй. Шөнө 01:00 цаг болж байхад би цагдаад дуудлага өгсөн юм. Өөр хүмүүс бас дуудлага өгсөн байх. Яг манай цонхны доор унасан. Дээд талын айл харсан юм шиг байна лээ. Орилоод, пижгэнээд л явчихсан. Тэгэхээр нь босож очоод хартал манай хүүхдүүд дагаад бас харах гэхээр нь айчих байх гээд хөшгөө хаагаад, зурагтныхаа дууг чангалчихсан юм. Тэгтэл нэг охин, нэг эмэгтэй хоёр зурагтны дуунаас давтал орилоод, уйлаад байсан.

Хар өнгийн юүдэнтэй цамц, цэнхэр жийнсэн өмдтэй хүн, ертөнцийн зүгээр чанх урагш, доошоо хараад уначихсан байсан. Ямар ч хөдөлгөөн байхгүй. Маш чанга дуугарсан шүү дээ. Манай гэрийн цонх доргих шиг болсон. “Пид” гээд л явчихсан. Бие нь бяцартлаа унасан юмуу гэмээр хувцсан дотроо нэлээн тарчихсан байсан. Намайг цагдаад дуудлага өгөхөөс ердөө 2-3 минутын өмнөхөн л унасан. 00:50-01:00 цагийн хооронд болсон гэсэн үг. Хөл гар нь ийш тийшээ хараагүй, яг чанх урд зүг рүү, доошоо хараад уначихсан байсан” гэлээ.

“00:00 ЦАГ ӨНГӨРЧ БАЙСАН БАЙХ, ЭЭЖ НЬ ХАШХИРААД Л БАЙСАН”

Албан бус эх сурвалжийн мэдээллээр талийгаач эмэгтэй ээжтэйгээ маргалдсаны улмаас 12 давхраас үсэрч, амиа алдсан байж болзошгүй байна. Тэгвэл энэ хэрэг болохын өмнө талийгчийн амьдардаг байсан давхрын нэгэн оршин суугч ээж охин хоёрын хашхиралдахыг сонсчээ. Тэрбээр “Ээж нь хашхираад л байсан. Яг юу болсныг мэдэхгүй байна. Тэр үед 00:00 цаг өнгөрч байсан байх. Уг нь энэ айлын хүмүүс гайгүй. Ер нь манай давхар чимээ шуугиан багатай. Нэг хөөрхөн охин байгаад л байдаг байсан. Оюутан юм болов уу гэж байсан юм. Аав ээж нь миний үеийн л хүмүүс” гэв.

“ААВ ЭЭЖ НЬ АРХИ ДАРС УУДАГГҮЙ ДАРУУХАН ХҮМҮҮС”

Өндрөөс унаж нас барсан 17 настай талийгаач эмэгтэй гэртээ 4-5 хоног ирээгүй талаар албан бус эх сурвалж мэдээлэв. Тэгвэл тус хотхоны СӨХ-ын ажилтан хэрэг гардаг өдөр 00:00-01:00 цагийн үед тэдний гэрийн хүмүүс очсон талаар хэлсэн юм.

Тэрбээр “2018 он гэхэд эднийх байрандаа орсон байсан. Ээж нь багш, аав нь инженер мэргэжилтэй хүмүүс. Талийгаачтай адилхан ихэр юмуу гэмээр нэг охин байх ёстой. Тэднийд 2-3 гэр бүлийн хүмүүс хамт амьдардаг. Хүү нь гараад явж л байдаг. Охин нь ч бас гараад явж л байдаг. Шөнийн 00:00 цагаас 01:00 цагийн үед хүмүүс нь гэртээ ирсэн гэнэ лээ.

Тэрний дараахан “пид” гээд л уначихсан. Тэгээд л орилоон, шуугиан болоод цагдаа, түргэний машин ирсэн. Аав ээж нь 50 орчим насны хүмүүс байдаг. Архи, дарс уудаггүй даруухан хүмүүс шүү дээ. Тааралдахаараа“Сайн уу. Сайн, юу байна” гээд л өнгөрдөг. Өөр нарийн ширийн юмыг нь мэдэхгүй” гэв.

Харин СБД-ийн 11 хорооны хэсгийн ахлагч энэ хэргийн талаар “Тэднийх “Гэрэлтжин” хотхоны үндсэн оршин суугчийн бүртгэлтэй юм байна лээ. Бүртгэл дээр нэг хүүхэдтэй, ам бүл гурав гэсэн байна. Аав ээж хоёр нь хоёулаа 1973 оны хүмүүс. Харин охин нь 2003 онд төрсөн. Ээж нь *** сургуульд бага ангийн багшаар ажилладаг. Аав нь инженер хүн. Ганцхан охинтой” гэв.

Одоогоор энэ хэргийг Сүхбаатар дүүргийн Цагдаагийн хоёрдугаар хэлтэст шалгаж байгаа талаар ЦЕГ-ын Хэвлэлийн мэдээллийн төвийн ахлах мэргэжилтэн, хошууч О.Эрдэнэхишиг мэдээлсэн. Уг хэргийг эх сурвалжуудын мэдээлэлд тулгуурлан ерөнхийд нь зангидвал 17 настай талийгаач эмэгтэй 4-5 хоног гэртээ ирээгүй бөгөөд үүний улмаас ээжтэйгээ маргалдаж, улмаар 12 давхраас унаж, амиа алдсан байж болзошгүй байгаа юм.

Эрүүгийн хуулийн 10.4 дүгээр зүйлд зааснаар хүнийг амиа хорлоход гарцаагүй хүргэсэн бол хоёр жилээс найман жил хүртэл хугацаагаар хорих ял шийтгэнэ гэсэн байдаг. Хэрэв цагдаагийн байгууллагаас 17 настай эмэгтэйтэй хамт байсан хүмсүүсийг шалган, амиа хорлоход хүргэсэн нь тогтоогдсон тохиолдолд цагдан хорих арга хэмжээ авах юм.