Эрүүл мэндийн ажилтнуудын ҮЭХ-ноос “Цар тахал ба цалин хөлс” нэртэй хэвлэлийн хурал зарлаж, “Ковид-19” цар тахлын үед ажиллаж буй эмч, эмнэлгийн ажилтнуудын цалин хөлс болон нэмэгдэл цалингийн талаар мэдээлэл өглөө. 2011 онд батлагдсан Эрүүл мэндийн тухай хуулийн 30.1-т зааснаар “Гамшгийн үед эрүүл мэндийн ажилтнуудын цалин хөлсийг гурав дахин нэмэгдүүлж олгох” тухай заасныг эмнэлгийн байгууллагын төлөөллүүд онцолж байв.

Хэвлэлийн хурлын үеэр Эрүүл мэндийн ажилтнуудын ҮЭХ-ны дарга Х.Ариунаа

“2019 оноос хойш цалин нэмээгүй. Эмч, эмнэлгийн байгууллагын ажилтнууд бүтэн нэг жилийн гаруйн хугацаанд амралт, баяр ёслол гэлгүйгээр тууштай ажиллаж ирсэн. Гэтэл цар тахлын энэ цаг үед эмнэлгийн байгууллагын ажилтнуудын эрх ноцтой зөрчигдөж байна. Их эмчийн дундаж цалин 750 мянгаас 850 мянган төгрөг. Харин сувилагч 670 мянгаас 720 мянган төгрөгний цалинтай ажиллаж байна. Эмнэлгийн байгууллагын ажилтнууд урьдчилгаа цалин гэж 300 мянган төгрөг хүрэхгүй цалин авч, түүнийгээ банкны зээлэнд өгөөд дараа нь 20 мянган төгрөгтэй л үлдэж байна шүү дээ” гэсэн юм.