Одоогоос гурван жилийн өмнө хөл бөмбөгийн талбайн төмөр унаж, талбайд тоглож байсан тавдугаар ангийн хүү амиа алдсан харамсалтай хэрэг гарч байв. Өнгөрсөн оны тавдугаар сарын 3-нд Чингэлтэй дүүргийн XVII хорооны нутаг дэвсгэрт байрлах тоглоомын талбайд тоглож байсан есөн настай охины дээрээс төмөр гулсуур мөн л  унаж, уушгиа тайруулахад хүрсэн. Мөн 2020 оны есдүгээр сард Баянзүрх дүүргийн XIV хороонд байрлах “Цагаан хуаран” хотхоны тоглоомын талбайд тоглож байсан зургаан настай охины дээрээс бэхэлгээгүй гулсуур унаж, баруун гараа хугалж, зөөлөн эдийн гэмтэл авсан зэрэг хамгийн аюулгүй тоглох газраа хүүхдүүд аюулд өртсөн тохиолдол удаа дараа гарч байв. Урин цаг ирж буй энэ үед гадаа тоглох хүүхдийн тоо эрс нэмэгддэг. Хэдий цар тахлын нөхцөл байдлаас шалтгаалж гадаа тоглох хүүхдийн тоо өмнөх жилүүдээс цөөн байгаа ч хүүхдийн тоглоомын талбайн аюулгүй байдлыг хангах ёстой. Тиймээс бид хүүхдийн тоглоомын талбайн аюулгүй байдлыг хэрхэн хангасан эсэхийг цувралаар сурвалжлан хүргэж буй. Энэ удаад Баянзүрх дүүргийн нутаг дэвсгэрт байрлах тоглоомын талбайнуудад хүүхдүүдийг ямар аюул “отож” байгааг гэрэл зургийн сурвалжилгаар харуулж байна.

Баянзүрх дүүргийн VI хорооны 64 дүгээр байр:

-64 дүгээр байрны зэргэлдээх “Хөөрхөн Маамуу” цэцэрлэгийн гадаах тоглоомын талбайн гулсуур доод хэсгээрээ хагарсан байдалтай байв.

Баянзүрх дүүргийн V хорооны ШУТИС-ийн IV оюутны байр:

-Тус оюутны байрны гадаах сагсан бөмбөгийн талбайг хүрээлсэн тор салж, дотогшоо унжжээ.

Баянзүрх дүүргийн V хороо 90/1 байр:

-90/1 байрны гадаах тоглоомын талбайн гулсуур нь өгсөх шатандаа хамгаалалтын хаалт хаалтгүй, зарим хэсгээрээ гагнаас нь салж, гулсуур нь дээд хэсгээрээ цуурсан харагдана. Үүгээр ч зогсохгүй тоглоомын талбайд хуучин, эвдэрч, гэмтсэн тоглоомуудыг хаяж, бага насны хүүхдийн тоглоомын талбай ихэнх зайг эзэлжээ.

Баянзүрх дүүргийн XXII хорооны 75 дугаар байр:

-Тус байрны гадаах тоглоомын талбайн гулсуурын гол хэсэгт том хагарсан нүхийг хатуу хивсэнцэрээр бөглөсөн байв.

Баянзүрх дүүргийн V хороо Алтан-Өлгийн 22 дугаар гудамж:

-Эл гудамжны тоглоомын талбайн гулсуурын боолт нь суларч, зарим нь салсан байв. Бага насны хүүхэд тоглоход хэзээд ч салж, унаж мэдэхээр харагдаж байлаа.

Баянзүрх дүүргийн IV хороо “Сүлдэт өргөө”:

-“Сүлдэт өргөө” хотхоны 51Б, 51В, 51Г байрнууд дундаа ганцхан тоглоомын талбайтай. Гэвч тоглоомын талбай нь нарны тусгал хүрдэггүй сүүдэр газарт, хатуу цементэн шалтай. Тоглоомын газрын зарим модон тоглоомын хэсгүүд нь шатсан бололтой хайлж, урссан, заримыг нь тойруулан хог хаягдал хаясан байгаа нь хүүхэд эрүүл аюулгүй орчинд тоглох боломжоор хангаагүй байгаа нь харагдаж байв.

Баянзүрх дүүргийн VII хорооны 9А, 9Б байр:

-Уг байрнуудын гадаа байрлах тоглоомын талбайн цементэн шал хагарч8 савлуур нь салж унасан, эргэдэг тавцан нь ирмэгээ тойрч хугарсан байгаа нь.

Баянзүрх дүүргийн XVIII хороо нийслэлийн 129 дүгээр цэцэрлэг:

-Цэцэрлэгийн гадаах тоглоомын талбайд тоглож байгаа хүүхэд байсангүй. Хүүхдээ тэврээд салхилж яваа цөөн эцэг, эх л харагдана. Ихэнх тоглоом нь салж унасан, шороо тоосонд дарагдсан байх аж.

Баянзүрх дүүргийн V хороо 85АБ байр:

-Төмөр суурьтай гулсуур, модон дүүжинтэй тоглоомын газрын тоглоомуудыг тогтоохоор хадсан хадааснууд нь ил гарчээ.

Баянзүрх дүүргийн XVI хороо 33 дугаар байр:

-33 дугаар байрны гадаах тоглоомын талбайн цементэн шал нь хагарчээ, гулсуур нь доод хэсгээрээ том хэмжээтэй цөмөрчээ. Эл газар хүүхдийн тоглоомын талбай биш томчуудын цуглаж, согтууруулах ундаа ууж, тамхи татдаг газар болсон байв.

Баянзүрх дүүргийн VIII хороо 79 дүгээр байр:

-Уг байрны гадаах тоглоомын талбайн гулсуурны нэг талын боолт нь суларч, нөгөө тал руугаа хазайжээ. Гэсэн ч хүүхдүүд дээш авирч тоглож байгаа харагдана.

Баянзүрх дүүргийн XVI хороо 81 дүгээр байр:

-81 дүгээр байрны гадаах тоглоомын талбайн хашлагын оронд намхан мод тойруулж, араас нь армотурын төмрөөр хашиж тогтоожээ.

Баянзүрх дүүргийн VIII хороо X Apartment-2 байр:

-Уг байрны гадаах тоглоомын талбайн шалавчны хавтан нь нугаларч, хэдэн тийш сарайсан байв. Савлууран тоглоомынх нь гинж элэгдэж, хэзээд тасарч унахад бэлэн болжээ.

О.БАТ-ЭРДЭНЭ, Д.ЦЭДЭВСҮРЭН