Төр нийгмийн зүтгэлтэн С.Зориг агсныг хөнөөсөн хэрэгт холбоотойгоор Б.Содномдаржаа, Т.Чимгээ нарт 20-24 жилийн хорих ял оноосон. Тэгвэл энэ сарын 8-нд Монгол Улсын Ерөнхий сайд Л.Оюун-Эрдэнэ хорих 401 дүгээр ангид хоригдож байгаа  Т.Чимгээтэй уулзсан. Үүний дараа Т.Чимгээ өөрийг нь эрүүдэн шүүсэн бичлэгийг олон нийтэд дэлгэхийг хүссэн учир тухайн бичлэгийг олон нийтэд дэлгэсэн. Үүнтэй холбоотойгоор өнөөдөр С.Зориг агсныг хөнөөсөн хэрэгт холбогдсон Т.Чимгээгийн нөхөр болон ар гэрийнхэн нь Хэлмэгсдийн хөшөөний дэргэд өлсгөлөн зарлаж, мэдэгдэл хийлээ. Т.Чимгээгийн ах Т.Хүрэлбат

“Дүүгээ суллахын тулд амиа зориулахад бэлэн байна. Ямар ч тэнэг хүн харсан ойлгохоор эмэгтэй хүнийг доромжилсон дүрс бичлэг цацагдаад байхад хүртэл шүүх, цагдаагийнхан үүнийг шийдэж чадахгүй байна. Шүүхэд тийм тэнэг хүмүүс байдаг юм уу, аль эсвэл цаанаасаа даалгавартай байдаг юм уу мэдэхгүй байна. Хэн ч харсан ойлгомжтой байхад шийдчих байлгүй гэсээр би хоёр жил хүлээлээ. Дүүгийн минь амь, эрүүл мэнд өдрөөс өдөрт доройтож байна. Би хуулийг хүндэлж байгаа нэрээр дүүгээ долоон жил шоронд суулгалаа. Одоо би амиа зольж өлсгөлөн зарлана. Энэ хэргийг шийдэх ёстой шүүгчид нь бидний татварын мөнгөөр хоолоо олж идээд одоо зүгээр л ажиллаж байна шүү дээ. Т.Чимгээгийн ар гэрийнхний амьдрал сүйрсэн. Бид хоёрын ээж 80 настай хөгшин хөдөө байдаг. Би ээжийгээ аргадахын тулд Т.Чимгээг “Маргааш гарчих байх” гэсээр цаг хугацааг барж ирсэн. Энэ тэмцэл надаар дуусахгүй. Миний дүү нар гарч ирнэ. Монголын шүүх шударга болоход хэдэн хүний амь хэрэгтэй байдаг. Түүнийг нь зориулна” гэв.

Мөн Т.Чимгээгийн ах Т.Хүрэлбат Монгол Улсын Үндэсний Аюулгүйн Зөвлөлийн гишүүдэд гэрээслэл үлдээсэн талаараа мэдээлэв. Тэрбээр уг гэрээслэлдээ “Намайг өлсгөлөн зарласны хариуцагыг ТЕГ-ын дарга асан Б.Хурц хүлээх болно” гэж мэдэгдлээ.