Морь унасан толгойгүй хүн гэдэг шиг хотоор дүүрэн дүрэмгүй, будилуу, сандруу жолооч хөдөлгөөнд оролцож байна. Сандрахаараа л хааз, тоормосоо андуурч гишгээд, хашаа, замтай хавийн амьтныг хавсарч байна. Хэчнээн хүний амь, хүүхдийн аминд хүрч байж хариуцлагагүй, хааз, тоормосоос ч ялгадаггүй жолоочид хариуцлага үүрүүлж, чанаргүй жолооч бэлтгэж байгаа жолооны сургуулиудтай хатуу ярих вэ.

       Жолоодох эрхийн үнэмлэхгүй Ч.Маралмаа гэх эмэгтэй найз залуу Г.Батсүхийн ахын автомшиныг унаж, урсгал сөрөн долоон автомшин мөргөж, бага насны хоёр охиныг дайрсан ноцтой хэрэг хоёр жилийн өмнө гарсан. Ч.Маралмаагийн машинд дайруулсан хоёр охины нэгийнх нь хөл хүнд гэмтэж, ГССҮТ-д эмчлүүлж байгаад гарсан. Охидыг замын бетон хашлагатай хавсарч, мөргөж, чирч, дугуйны нөхөөс болгох шахсан. Охид насаараа хөгжлийн бэрхшээлтэй, автомашинаас айдаг, замын хөдөлгөөнд оролцохоос бэргэдэг сэтгэл зүйн эмгэгтэй болсон.

Охины аавын хамгийн сүүлд өгсөн мэдээллээр “Охиныг минь дайрч байгаа бичлэг нуун дарагдаж, олон нийтэд хүрээгүй байсан бол бид хохироод үлдэх байсан. Ямар азаар тэр бичлэгийг олон нийтэд нээлттэй болгосон юм бол доо гэж бодож сууна. Хоёрдугаарт, би охиныхоо гэмтсэн хөлний зургийг шүүх шинжилгээний дүгнэлт  гарахаас өмнө олон нийтийн сүлжээнд цацах ёстой байжээ. Хэрэв тэгсэн бол миний охины шүүх шинжилгээний дүгнэлт үнэнээрээ гарах байсан байх. Үүнд л маш их харамсаж байна. Би хуультай оронд амьдарч байгаа учраас итгэж байсан юм. Ийм жаахан охиныг тэгж их гэмтчихээд байхад хөнгөн гэж дүгнэнэ гэж хэрхэн санах билээ дээ. Тэр айлынхан биднийг доромжилж байгаа юм шиг хандсан. Увуулж, цувуулаад, бөөн юм болж байж 10 орчим сая төгрөг өгсөн байх. Энийгээ бүр 500, 800 мянган төгрөгөөр цувуулсан шүү дээ. Түүнээс биш бидэнд тоолж барашгүй их хэмжээний мөнгө өгөөд, биднийг дуугүй болгочихсон юм биш. Бид ч охиноо зарж идэх хүмүүс биш. Чухамдаа охиноо асраад, эмчилгээг нь үр дүнтэй болохыг хүлээгээд л сууж байгаа улс” гэсэн байдаг.

Харин Баянзүрх дүүргийн Эрүүгийн хэргийн анхны шатны шүүхээс Ч.Маралмаад тээврийн хэрэгсэл жолоодох эрхийг гурван жилээр хасах, зорчих эрхийг хоёр жилээр хязгаарлах ял шийтгэл ногдуулсан. Шүүгдэгч Ч.Маралмаа болон түүний өмгөөлөгч Нийслэлийн эрүүгийн хэргийн давж заалдах шатны шүүх болон Улсын дээд шүүхэд гомдол гаргаснаар анхан шатны шүүхийн шийдвэрийн тогтоолыг түдгэлзүүлсэн. Улсын дээд шүүхээс 2023 оны долоодугаар сарын 5-нд  хяналтын гомдлыг хэлэлцэхээс татгалзсанаар анхан шатны шүүхийн шийдвэр хүчин төгөлдөр болсон. Өөрөөр хэлбэл, Ч.Маралмаагийн зорчих эрхийн шийтгэл ирэх долдугаар сард дуусах юм.

Үнэндээ, монголчууд Ч.Маралмаа шиг эмэгтэй жолоочдоос айж байна. Явган хүний замаар зорчиж байхад нь хэзээ ирээд мөргөчих бол гэсэн айдастай амьдарч байна. Хэдхэн хоногийн өмнө хааз, тоормосоо андуурч гишгэсэн гэх эмэгтэй долоон хүүхэд, нэг том хүнийг блокон хашаатай мөргөж, 16 настай охин газар дээрээ нас барсан. Үлдсэн хүмүүс нь Гэмтлийн эмнэлэгт хүнд байдалтай байна.

Тодруулбал,  Чингэлтэй дүүргийн 15 дугаар хорооны нутаг дэвсгэр буюу Хайлааст орчимд энэ сарын 17-нд зам тээврийн ноцтой осол гарч, “Toyota Prius” маркийн автомашин “Hyundai Verna” маркийн автомашинтай мөргөлдсөний улмаас явганаар зорчиж байсан долоон хүнийг мөргөсөн байдаг. Осолд өртсөн дөрвөн хүн нь нэг гэр бүлийнх. Талийгаач охины гэрээс гурван хүн үхэл, амьдралын заагт байгаа юм. Хүүхдүүдийг сургуулиас нь авсан 25 настай эгч нь хэд хэдэн удаагийн яаралтай мэс засалд орсон ч ухаангүй ороогүй байна. Түүний долоон хавирга хугарч, бүсэлхийнээс доош мэдээгүй, тархиндаа хүртэл авчээ. Мөн түүний гуравдугаар ангийн хүү хүнд бэртэлтэй Эрчимт эмчилгээний тасагт эмчлүүлж байна.

Энэ талаар хүүхдүүдийн ээж “16-хан настай охиноо алдсан би яах учраа олохгүй самгардаж явна. 25 настай охины минь уушги, элэг, бөөр, хавирганууд нь бяцралттай, биеийн байдал нь маш хүнд байгаа. Эмч нар бидэнд сэтгэл санааны бэлтгэлтэй байгаарай гэж хэлсэн. Ач, зээ хоёр минь ухаан орсон. Гэсэн ч бэлхүүснээс нь доош мэдээгүй байгаа. Эмч нар мэдээ оруулах эмчилгээ хийж байгаа гэсэн. Хэзээ явж чадахыг нь бас мэдэхгүй байна. Бас хоёр хүүгээ суугаа болчих вий гэж айж байна. Хоёр машин мөргөлдсөний улмаас хүүхдүүд минь амь, эрүүл мэндээрээ хохирсон гэдгийг өмэдсэн. Надтай нэг жолооч нь ирж уулзаад охины минь буяны ажлыг нь даана гэсэн. Өөр хүнтэй уулзаагүй байгаа. Нөгөө жолооч нь ямар учиртай хүн байсныг мэдээгүй байгаа” гэсэн юм.

Нэг айлын дөрвөн хүн гарцаар гарч яваад, мөргүүллээ. Нэг нь газар дээрээ нас барж, үлдсэн гурав нь эмнэлгийн орон дээр тарчилж байна. Мөн тэдэнтэй хамт гарцаар гарч явсан гурван хүүхдийн биеийн байдал ч хүнд байгаа аж. Хүүхдүүдийн шөрмөс тасарч, хэд хэдэн удаа хагалгаанд ороод байгаа юм.

ЖОЛООНЫ ҮНЭМЛЭХ ОЛГОДОГ СУРГАЛТУУДАД ШАЛГАЛТ ОРУУЛЪЯ

        Үнэндээ, мөнгөний төлөө үнэмлэх худалддаг жолооны сургалтуудын балгаар иргэд хохирч байна. Тэр дундаа хүүхдүүд хөгжлийн бэрхшээлтэй болж, зарим нь хорвоогоос нялхаараа буцаж байна. Жолооны багш нар сургалтаа чанартай орж, мөнгөөр үнэмлэх худалддаггүй бол энэ олон хариуцлагагүй, чадваргүй жолоочид төгсөхгүй байх байлаа.  

600 мянган төгрөгөөр “хулхи” үнэмлэх хэвлэж, хариуцлагагүй, хааз, тоормосоо ялгадаггүй жолооч бэлтгэдэг жолооны сургалтуудад хариуцлага тооцож, шалгалт оруулъя. Хааз, тоормосоо ялгаж чадахгүй болтлоо сандардаг бол жолооч нарт үнэмлэх үйлдвэрлэхээ болъё. Хариуцлагагүй жолооч бэлтгэж байгаа жолооны сургуулиудын эрхийг хасаж, хатуу хариуцлага тооцох цаг болжээ. 

Хэдэн хүний амиар хуулиа чангатгаж, хүний үрсийг хариуцлагагүй жолооч нараас хамгаалах вэ...