-УЕП Б.ЖАРГАЛСАЙХАНЫ АНГИЙН ХҮҮХЭД, ДОТНЫ НАЙЗ ГЭДГЭЭР НЬ ТҮҮНИЙ ҮЙЛДСЭН ГЭМТ ХЭРГИЙГ ДАРДАГ ГЭНЭ-

             Гэмт хэрэг үйлдсэн этгээдүүдийг илтэд хаацайлж, хүчин төгөлдөр мөрдөгдөж байгаа хуулийг “улан доороо гишгэж”, эрх мэдэл албан тушаалаа урвуулан ашиглаж, бусдаас авлига авдаг, үүнийхээ хүрээнд хэрэг наймаалцаж, гэмт хэрэгтнүүдэд холбогдох хэргийг хэрэгсэхгүй болгодог прокуроруудын хууль бус үйлдүүд ил гарсаар байгаа.

               УИХ-ын гишүүн асан С.Эрдэнэ, УИХ-ын гишүүн Сү.Батболд, УИХ-ын гишүүн А.Адъяасүрэн нарын үйлдсэн гэмт хэргийг хэрэгсэхгүй болгосон прокуроруудын дуулиан шуугиан намжаагүй байна. Тодруулбал, дээрх нэр бүхий хүмүүсийн үйлдсэн гэмт хэргийг мөрдөн байцаагч нар мөрдөн байцаалтаар тогтоож, гэм бурууг нь баримтаар бүрдүүлчихээд байхад Нийслэлийн прокурорын газраас “Гэмт хэргийн бүрэлдэхүүнгүй” хэмээн үзэж, хэрэгсэхгүй болгосон билээ. Тэгвэл үүнтэй яг адил Баян-Өлгий аймагт гэмт хэрэгтнүүдийн хэргийг улаан, цагаан хаацайлж, хэрэгсэхгүй болгодог дархан эрхтэй прокурор тодроод удаж байгаа гэнэ. Түүний нэрийг Т.Батсүх гэнэ. Тэрбээр 2011 оноос өнөөдрийг хүртэл тасралтгүй арав гаруй жил Баян-Өлгий аймгийн ерөнхий прокурор хийж байгаа нэгэн. Улсын ерөнхий прокурор Жаргалсайханы ангийнх нь хүүхэд Баян-Өлгий аймгийн ерөнхий прокурор Т.Батсүхийн хууль бус үйлдэл хэрээс хэтэрснийг эх сурвалж бидэнд мэдээллээ.

БАЯН-ӨЛГИЙ АЙМГИЙН ЭМЧ НАРЫН БУСДЫГ ХУУРАМЧААР ХЭЛГҮЙ, ДҮЛИЙ БОЛГОДОГ 400 ГАРУЙ ҮЙЛДЭЛТЭЙ ХЭРГИЙГ ЗАМХРУУЛАХ ГЭЭД БАЙГАА ШАЛТГААН

         Баян-Өлгий аймгийн Нийгмийн даатгалын газар, эмнэлгийн дарга, эмч нар тэргүүтэй хүмүүс өнгөрсөн жил нийтдээ 498 удаагийн үйлдлээр бусдаас авлига авсан, 153 удаагийн үйлдлээр бусдад давуу эрх олгосон нь тогтоогдсон ноцтой хэрэг гарсан. Тодруулбал, Баян-Өлгий аймгийн эмч нар эрүүл саруул хүмүүсийг хуурамчаар хэлгүй дүлий “болгон”, хөгжлийн бэрхшээлтэй, сэтгэцийн өвчтэй, мөн хагас, бүтэн өнчин хүүхдүүдийн улсаас авах ёстой нийгмийн халамжаас сар бүр авдаг байсан нь ил болсон. АТГ-аас дээрх хэргийг шалгаад 40 гаруй эмчид эрүүгийн хэрэг үүсгэн шалгаж эхэлсэн. Гэвч дээрх хэргийг Баян-Өлгий аймагт шалгах явцад ямар нэгэн хүч нөлөөлж, хууль хяналтынхан шалгахгүй, шалгалаа ч прокурор, шүүхийн нэр бүхий албан тушаалтнууд удаа дараа хаацайлаад байсан учир арга буюу Ховд аймагт хэргийг шилжүүлэн шалгаж байгаа билээ. Тэгвэл эх сурвалж уг сүлжээ хэргийг хамгаалаад байгаа гол хүн нь Т.Батсүх прокурор гэдгийг онцолж байлаа.

         Өөр нэг ноцтой хэрэг нь Баян-Өлгий аймгийн ерөнхий прокурор Т.Батсүх, хяналтын прокурор Б.Ботакез нартай холбоотой асуудал байдаг. Тус аймгийн аж ахуйн үйлчилгээний “СУАТ” ХКК-ийн гүйцэтгэх захирал Ж.Адалбек нь 2017 оны зургадугаар сарын 12-нд өөрийн баз Ө.Бахытбекийн найз болох И.Хибратыг компанидаа ажилд томилохын тулд гурван сая төгрөгийн авлига авчээ. Тэрбээр баз хүргэн болох Ө.Бахытбекээр дамжуулан гурван сая төгрөг авсныхаа дараа И.Хибратын тушаалыг гаргаж, ажилд авчээ. Түүнчлэн Ж.Адалбек нь Баян-Өлгий аймгийн аж ахуйн үйлчилгээний “СУАТ” ХКК-ийн ерөнхий нягтлан бодогч А.Нуртуганыг “Ажлаас нь хална” гэж дарамталсан гомдол гарчээ. Түүнийг ийнхүү хясан боогдуулж, “СКС” маркийн ангийн буу хахуульд авсан нь тогтоогдсон байна. Дээрх хэргүүдийн мөрдөн байцаалтын ажиллагаа дуусч, шүүхэд шилжүүлэх саналтайгаар прокурорт шилжүүлжээ. Гэтэл Т.Батсүх нь 2019 оны есдүгээр сарын 20-ны өдрийн тогтоолоор аль алиныг нь “Гэмт хэргийн бүрэлдэхүүнгүй” гэх үндэслэлээр хэрэгсэхгүй болгожээ. Гэхдээ холбогдох хууль хяналтын байгууллагаас дээрх хэрэгт гомдол гаргаж, шүүхэд шилжүүлсэн байна.

       Түүнчлэн Т.Батсүх болон хяналтын прокурор Б.Ботазез нар нь “СУАТ” ХКК-ийн гүйцэтгэх захирал Ж.Адалбек, Ө.Бахытбек, И.Хибрат нарт давуу байдал бий болгож, Эрүүгийн хуулийн 21.14 дүгээр зүйлийн нэг дэх хэсэгт заасан мэргэжлийн үйл ажиллагааг хууль бусаар явуулсан. Мөн хуулийн 22.1  дүгээр зүйлийн  нэг дэх хэсэгт зааснаар албан үүрэг, бүрэн эрхийн байдлаа урвуулан ашиглаж бусдад давуу эрх олгосон нь тогтоогдсон байдаг. Гэвч тэдэнд эрүүгийн хэрэг үүсгэн, бусдаас авлига авсан байж болзошгүй үндэслэлээр шалгах гэхээр прокурорын удирдах ажилтнууд удаа дараа “мулталдаг” гэнэ.

        Энэ мэт олон асуудал Т.Батсүх прокурорыг тойрон эргэлдэж, санал гомдол олноор гарах болжээ. Гэтэл Улсын ерөнхий прокурор Жаргалсайханы ангийнх нь хүүхэд, дотны найз гэсэн шалтгаанаар өнгөрсөн хугацаанд түүнтэй холбоотой ямар ч санал гомдлыг хав дараад өнгөрдөг аж.

           Ийм нэгэн прокурорын хууль бус үйлдэл Баян-Өлгий аймгаас дуулдах болжээ. Түүнд хариуцлага тооцох, хууль сануулах хүн, хууль Монголд олдохгүй нь бололтой.

Баян-өлгий аймгийн Ерөнхий прокурор Т.Батсүхийг Улсын ерөнхий прокурор Жаргалсайхан ангийнхаа хүүхэд, дотны найз гэсэн шалтгаанаар түүнтэй холбоотой ямар ч гомдлыг хав дараад өнгөрдөг гэнэ