УИХ-ын гишүүн асан, “Эрчис монгол”-ын “эзэн” Г.Амартүвшин улсаасаа ахиад урвана даа, урвана. Тэр төр түшилцэж, төрийн өмчит компанийг удирдахаасаа өмнө Монгол Улсын иргэншлээс татгалзаж, өөр улсын иргэн байж үзсэн нэгэн. Амташсан хэрээ арван гурав эргэнэ гэгчээр Г.Амартүвшин энэ улсын иргэнээс дахин татгалзах нь цаг хугацааны асуудал биз ээ. Хуулиараа хэн ч Монгол Улсын иргэншлээс татгалзах эрхтэй ч гэлээ төр түшилцэж, улсын нууцтай танилцаж, чухал албан тушаал хашиж явсан эрхмүүдийг өөр улсын харьяат болохыг зөвшөөрөх нь Үндэсний аюулгүй байдалд заналхийлж буй хэрэг биш гэж үү. Иймд бид төрийн түшээдийг нэг л улстай, нэг л эх оронтой байхыг уриалж байна.

    Бүхэл бүтэн улсын хил хамгаалах байгууллагыг удирдаж, дэд даргаар нь ажиллаж, төр түшилцэж байсан эрхэм Монгол Улсын иргэншлээс татгалзаад арван жил өнгөрлөө. Улсын хамгийн чухал, хариуцлагатай албыг хашиж, улмаар УИХ-д хоёр ч удаа улиран сонгогдож, Хууль зүй байнгын хороог ахалж байсан Х.Жекей арван жилийн өмнө Казахстан Улс руу урвасан. Хууль хяналтын байгууллагад шалгагдаж байхдаа эрүүл мэндийн шалтгаанаар энэ улс руу “зугтаад” эргэж ирээгүй талаар нь хэвлэлүүд мэдээлж байсан юм билээ. Иргэншлээ сольж, эх орноосоо “дүрвэсэн” УИХ-ын гишүүн асан Х.Жекей Казахстан Улсын тагнуулын байгууллагад чухал албан тушаал хашиж байгааг ч удаа дараа мэдэгдсэн байдаг. Эрх баригч намынхан Монгол Улсын дархан хилийг 39 жил маналцаж, хаана нь ямар чулуу, ямар гарц байгааг арван хураа шигээ мэддэг болсон бэлтгэгдсэн “цэрэг”-ээ УИХ-д найман жил залаад, улсын хамаг л чухал мэдээллийг дэлгэсэн ном, цоожгүй авдар шиг үзүүлчихээд, эцэст нь өөр улсын иргэн харьяат болгочихсон гэсэн үг. Инээдтэй гэхээс илүүтэй эмгэнэлтэй улс манайхаас өөр бий болов уу.

Х.Жекей Монгол Улсын Бригадын генерал цол хүртэж, Монголын “бурхан” шиг явлаа. Улсаасаа “урваад”, хоёр дахь эх орондоо дөрвөн жил амьдарсных нь дараа түүний цолыг хурааж байсан юм билээ. Тодруулбал, Монгол Улсын Ерөнхийлөгч, Зэвсэгт хүчний ерөнхий командлагч Х.Баттулга өнөөдөр зарлиг гаргаж бригадын генерал Х.Жекейн цолыг хурааж байжээ.

Зарлигт:

        Монгол Улсын Үндсэн хуулийн Гучин дөрөвдүгээр зүйлийн 1, Монгол Улсын Ерөнхийлөгчийн тухай хуулийн 9 дүгээр зүйлийн 1, Цэргийн албаны тухай хуулийн 28 дугаар зүйлийн 28.2 дахь хэсэг, Монгол Улсын Ерөнхийлөгчийн 2018 оны 3 дугаар сарын 27-ны өдрийн “Монгол Улсын харьяатаас гаргах тухай” 32 дугаар зарлигийг тус, тус үндэслэн ЗАРЛИГ БОЛГОХ нь: Монгол Улсын харьяатаас гарсан Халидалдагийн Жекейд олгосон дээд офицерын “Бригадын генерал” цолыг хураан авсугай” гэсэн байдаг.

     Үнэндээ, хуулиараа цолыг нь хураах ёстой ч гэлээ улсаасаа татгалзах эрхийг нь “хорьсон” бол үнэнд нийцэх байжээ. Монгол Улсын хил хамгаалах байгууллагын хэчнээн нууц, хэдий хэр хэмжээний мэдээлэл Х.Жекейн толгой, цээжинд байгаа бол гэдэг нь нэгдүгээр асуудал юм. Цолоо хураалгаж, Монгол Улсын иргэншлээс бүрэн татгалзсан Х.Жекей 2018 онд монголчуудад захиа бичиж байсан байдаг юм билээ.

Тодруулбал, тус захидалд,

-“Тагнуул байсан, эх ороноос урвсан урвагч" гэжээ. Манай нүүлдэлчин ард түмэнд "Усын уусан худаг руугаа бүү нулим" гэдгийн адил Монгол Улсаас Казахстанд шилжин суурьшиж амьдарч байгаа олон мянган түмнээс нэг ч тийм асуудал байхгүй бөгөөд цашдаа ч тийм бөлгөө. Учир нь хоёр улсын хооронд дайсагналсах үзэл бодол, улстөрийн хувьд зөрчилдөөн асуудал байхгүй гэдэг нь ойлгомжтой юм аа.

-Та бүгд мэдэж байгаа Монгол Улсын Ерөнхийлөгчийн зарлигаар хуулийн заалтын дагуу "Иргэнээс гарсан тул" надад олгосон "Бригадын генерал" цол хураагдсан тухай зарлиг гарсан. Хууль бол хууль, үүнд би харамсахгүй.

-Миний бие 2013 оны эхэнд цэргийн тэтгэвэр тогтоолсон билээ. 39 жил улсын хил хамгаалцаж, бүх амьдралаа түүнд үнэнчээр зориулсан минь үнэн. Одоохондоо Казахстан Улсад амьдарч байна. Энэ нь миний өөрийн хувийн сонголт. Монголын ард түмэнд сайн сайхныг ёрөөж, хөгжил цэцгэлтэнд амжилт хүсье” гэсэн байжээ. Ингээд Х.Жекей гэдэг хүний талаар Монгол Улсын хэн гуай ч дурсахгүй өнөөдөрт хүрчээ. Өөрөөр хэлбэл, Монгол Улс Х.Жекей гэдэг иргэнгүй болоод арав орчим жил болсон гэсэн үг л дээ.

            Энэ мэтээр Х.Жекейн замаар явсан улстөрчид бий. Араас нь, УИХ-ын гишүүн Г.Амартүвшин байх вий гэдгийг дахин сануулж байна.